Þá er maður byrjaður að vinna á Skýlinu. Fór á fyrstu vaktina í gær eftir vinnu í skólanum. Var orðin ansi þreytt í gærkvöldi - veit ekki hvort þetta séu ellimerki eða hvað.. Kolla er á leiðinni með liðið. Þau eru í Baldri núna. Bíllinn sem þau voru á var klesstur í bátnum áður en hann lagði af stað úr Hólminum. Það þurfti að hífa hann upp úr bátnum áður en lagt var af stað. Amma ætlar að sækja þau á Brjánslæk ef þau fá ekki bílaleigubíl. Þvílíkt gaman að byrja fríið sitt svona eða þannig!

Alveg er það merkilegt hvað fólk nennir að velta sér upp úr málefnum annarra. Ein sem er að kenna með mér sagði mér í gær að hún hefði verið spurð að því hvort það væri ,,allt í lagi" með mig - af því að ég á ekki kærasta... Vissulega væri gott að hafa einhvern til að kúra hjá sér og allt það - en fjandinn hafi það að lífið gangi út á það að finna einhvern. Ég er farin að skilja gellurnar í Sex and the City þegar þær voru að pirra sig á því þegar byrjað var að spurja um ástarlífið. Þetta er orðið svo mikið hjónasamfélag sem við búum í að það telst ekki eðlilegt að finnast það ágætt að vera einn. Ekki nema að það séu svona rosalega margir þarna úti sem óttast það mest af öllu að þurfa að vera einir. Ég held að það séu reyndar fleiri heldur en maður getur látið sér óra fyrir. Svo er maður kallaður vandlátur af því að maður vill ekki einhverja af þessum einhleypu karlmönnum sem búa hérna. Með fullri virðingu fyrir þessum gaurum þá eru þeir annað hvort þroskaheftir, of feitir eða of gamlir. En nei - ég er svo hryllilega vandlát... Og verð að viðurkenna það að ég er bara stolt af því!!! Ég ber það mikla virðingu fyrir sjálfri mér að ég býð ekki hverjum sem er upp í rúm til mín - sama hversu þörfin er mikil. Ef að það gefur liðinu hérna eitthvað til að blaðra um í sinni einsemd - sem að mínu mati er miklu eymdarlegri heldur en mín - þá er það svo sem allt í lagi. Ég þarf allavegana ekkert að vera að abbast upp á aðra og hnýsast í þeirra einkamál ef að þörfin fyrir karlmann er mikil - það er nefnilegast alltaf hægt að redda þessu sjálfur ;)

Ég sá í DV í gær að þátturinn hennar Önnu Kristine - Á milli mjalta og messu - er hættur á Bylgjunni. Og þótt fyrr hefði verið segi ég nú bara. Hún var að fá til sín fólk og fjallaði um lífshlaup þeirra. Í fyrstu voru þetta eflaust fínir þættir hjá henni en framboðið af fólki til að fara í svona þætti á Íslandi er bara mjög takmarkað. Enda var hún að fá til sín fólk á mínum aldri og spurja það út úr hvað á daga þess hafði drifið um ævina. Já, hmm, ég fermdist fyrir 7 árum og útskrifaðist sem stúdent í fyrra... Voða merkilegt!!

Sjómannadagurinn er á sunnudaginn og sigling á laugardaginn. Mig langar ekkert smá í siglinguna - en ég verð náttúrulega að vinna. Er að spá hvort ég eigi að reyna að fá einhvern til að vinna fyrir mig í tvo og hálfan tíma. Þetta er náttúrulega rólegasti tíminn á vaktinni. En ég sé til með það. Ég er að spá í að bjóða Njáli að gista hjá mér á laugardagskvöldið. Taka spólu og kaupa nammi og hafa það huggulegt. Ætla að sjá hvað hann segir - hann er kannski orðinn það gamall að hann nennir ekkert að hanga með gömlu frænku sinni. Karen Líf vill kannski vera með líka. Ég hugsa nefnilegast að ég nenni ekki á ballið. Ég var á kvöldvakt í gær, kvöldvakt í kvöld, skólinn + kvöldvakt á morgun, morgunvakt á laugardaginn, morgunstubbur og kvöldvakt á sunnudaginn.. Ég hugsa að ég verði orðin þreytt á helginni.. Ég næ samt formúlunni og hátíðahöldunum á sjómannadaginn á milli vakta. Það er meira heldur en ég náði í fyrra. Svo á ég frí á 17. júní!! Það er nú bara langt síðan ég hef átt það!!

Jæja, þá er bara einn dagur með gríslingunum eftir. Verð með tvö próf á morgun og síðan er bara einhver frágangsvinna eftir. Ég byrja á skýlinu á morgun. Var þar í gær að skoða vaktirnar mínar. Er búin að fá plan fyrir næstum allan júní. Verð að vinna næstu þrjár helgar - og verð á næturvöktum á tveimur af þeim. Ég vona bara að Agga verði búin að senda mér garnið, þá hef ég eitthvað við að vera -blikk-blikk. Amma kom í gær. Það var æðislegt hjá henni úti en samt náttúrulega gott að koma heim. Ágætt fyrir mig líka :p Verð að viðurkenna að ég var farin að sakna hennar blessaðrar. Kolla er að koma vestur á fimmtudaginn. Hún kemur með Njál og Karen Líf með sér. Ég verð að vísu að vinna alla helgina, en ég ætti nú að ná að gera eitthvað með þeim. Sixties verður að spila á sjómannadagsballinu hérna. Maður fær bara Kaffi Reykjavíkur flash back þegar maður heyrir minnst á þá! En ég er nú samt að spá í að kíkja aðeins. Það er nú ekki það oft sem það er ball hér!!

Þá eru ráðherralistarnir komnir fram. Ég var nú búin að segja að ég varð fyrir vonbrigðum með þessa nýju stjórn. Er ekki alveg að skilja af hverju það er verið að taka Björn Bjarnason aftur inn. Þá var það sterkari leikur hjá Halldóri að setja Árna Magnússon í ráðherrastöðu. Vissulega skil ég Jónínu og Magnús Stef., og þá sérstaklega Jónínu að vera ósátt. Hún kemur vel út í sínu kjördæmi og átti ráðherrastól fyllilega skilinn. Magnús hafði ekki eins sterka stöðu - enda tapaði Framsókn nokkru fylgi í kjördæminu. Þau eru hins vegar að gjalda fyrir það að vera alltof litlausir stjórnmálamenn - eða það held ég. Það er hægt að ganga fram hjá þeim án þess að það kosti eitthvað vesen. Þau sitja bara og standa eins og þeim er sagt. Að því leytinu er ég ánægð með Árna sem ráðherra. Það var kominn tími á nýja kynslóð í ráðherraliðinu. Ég vona bara að hann eigi eftir að standa sig vel. Hann hefur allavegana komið mjög vel fyrir þessa fyrstu daga sem ráðherra. Svo er spurning hvað verði gert við Siv þegar íhaldið fær umhverfisráðuneytið. Hún á ekki eftir að taka því þegjandi að vera ýtt út í horn...

Ég er ekki að ná þessu fjárdráttarmáli hjá Símanum. Ég skil ekki hvernig það er hægt að draga að sér svona mikið fé án þess að Ríkisendurskoðun kveiki á perunni. Vissulega er þetta lítill hluti af veltunni hjá Símanum - svona þannig lagað séð - en hvar liggja áherslurnar hjá Ríkisendurskoðun?? Þeir leggja Þorfinn Ómarsson í einelti út af einhverjum smámunum en taka ekki eftir þessu.... Reyndar hefur allur kvikmyndaiðnaðurinn beðið eftir því að eitthvað yrði gert í málefnum Þorfinns því að hann neitaði Davíð Oddsyni og Hrafni Gunnlaugssyni um styrk í fyrravetur. Það átti bara að koma honum frá hvernig sem það yrði gert. Þessir gaurar ættu að vera meira vakandi í staðinn fyrir að vera að eyða tíma í svona kjaftæði!

Svakalega er Birgitta Haukdal farin að fara í taugarnar á mér. Mér hefur nú alltaf fundist hún vera bara ágæt stelpugreyið en það er einhvern vegin búið að vera alltof mikið af henni í fjölmiðlum að undanförnu. Of væmið dæmi fyrir mig..

Jæja, garnirnar eru farnar að gaula. Ég ætla að fara að sjá hvort að maturinn sé tilbúinn hjá Hlédísi og fara svo heim. Er búin að vinna í dag! Algjört lúxuslíf!!

Daddara - mér leiðist!!! Ég var með eitt próf í morgun og er löngu búin að fara yfir það og ganga frá því. Í dag er viðvera til kl 4 þannig að ég hef verið að reyna að finna mér eitthvað til dundurs. Byrjaði á því að ganga frá námsbókum og taka til á borðinu mínu. Það tók nú ekki langa stund svo ég hef verið að reyna að finna mér eitthvað til að skoða á netinu. Verst bara hvað ég er lítil netmanneskja og kann lítið að leita að einhverju skemmtilegu :(

Ég er alveg steindauð eitthvað. Er ekkert inni í neinu sem er að gerast og ef ég er búin að mynda mér skoðun á einhverju þá er ég búin að gleyma því þegar ég ætla að blogga um það.. Gullfiskaminnið er alveg að fara með mig núna. Ég reyndar horfði ekkert á fréttir í seinustu viku þannig að það er kannski bara ekkert skrýtið að ég sé ekki inn í neinu.. Bleh, ég er bara að bulla hérna. Ætla að sjá hvort það sé ekki einhver til að spjalla við inn á kennarastofu...

Taco pizza

Botninn (ein bökunarplata):
5 dl hveiti (má vera 4 dl hvítt og 1 dl heilhveiti)
1 tsk salt
1 bréf þurrger
2 msk oregano
2 msk ólífuolía
3 dl ylvolgt vatn

Þessu er öllu hrært saman og sett á bökunarplötu sem búið er að smyrja með olíu og sáldra pínu hveiti yfir (við settum nú smjörpappír undir botninn)

Deigið er næstum smurt á plötuna (ef þér finnst deigið blautt máttu bæta svolitlu hveiti saman við en það á að vera aðeins blautara en venjulegt pizzadeig). Pizzan er sett inn í kaldan ofn sem er svo stilltur á 200°C. Hún þarf ekki að hefast áður. Bakað í 3-5 mín, tekið út og gumsinu klístrað ofan á í þessari röð:

Taco sósa (styrkleiki eftir smekk)
ostur
hakk (steikt og kryddað með tacokryddi)
laukur
paprika
tómatar (smátt saxaðir)
ostur

Þetta er bakað í ofni við 200°C í 10-15 mín eða þangað til að pizzan er fullbökuð. Þá er Taco-snakki dreift ofan á pizzuna og hún sett aftur inn í ofninn og bökuð í 5 mín til viðbótar. Með þessu er gott að bera fram tacosósu og sýrðan rjóma. Algjört nammi!!!!

Fyrst ég er komin inn á þær nótur að birta uppskriftir hérna þá ætla ég að láta fljóta með uppskrift að ídýfu sem er algjört nammi með tortilla snakki..

Byrja á að blanda saman einni dós af sýrðum rjóma og einni krukku af cheese salsa sósu í eldfast mót. Saxa smátt niður 6-7 tómata, sigta safann frá og setja yfir. Næst að saxa smátt niður hálfan lauk og dreifa yfir. Síðan að saxa smátt niður iceberg salat og dreifa yfir laukinn. Lokaskrefið er svo að rífa niður mozarella ost og setja yfir allt saman. Þetta er borið fram kalt. Alveg rosa gott!!!!

Var að tala við mömmu - hún var ekkert að ná því að ég væri að setja uppskriftir inn á síðuna mína.. Batnandi fólki er víst best að lifa...

Aldrei er maður sáttur við sitt. Ég er búin að vera að reyna að njóta þess að vera í fríi í dag. Þarf ekkert að vinna eða gera. Og þá hundleiðist manni!! Verð að vinna alla næstu helgi og helgina þar á eftir og eflaust þar á eftir.. Á svona dögum saknar maður þess að eiga ekki kærasta :( Það verða samt varla margir svona dagar í sumar. Eða ég vona ekki. Ella fer að fara í Reykjarfjörðinn og Hrafnhildur verður fyrir sunnan í sumar.. Gunna Soffa verður reyndar hérna og aldrei að vita nema við djömmum eitthvað þegar við eigum frí í vinnunni.

Anyways, Ella eldaði tacopizzu fyrir okkur í gær. Hún var alveg þvílíkt góð!!!! Þarf að muna eftir að setja uppskriftina hérna inn. Við lágum afvelta fyrir framan Eurovision eftir matinn og sötruðum bjór. Hlógum mikið af sumum atriðunum sem voru alveg hreint yfirmáta hallærisleg. Mér fannst Gísli Marteinn vera full íhaldssamur þegar hann var að lýsa sumum búningunum. Það var ekkert þarna sem var ekki við hæfi barna eins og hann vildi meina. Eða ekki fannst mér það. Hann var samt nokkuð góður. Lifði sig alveg inn í þularhlutverkið.Birgitta og íslenski hópurinn stóðu sig virkilega vel. Voru landi og þjóð til sóma að mínu mati. Lagið sem vann fannst mér ekkert sérstakt, ég var heldur ekki alveg að fatta þessar bleiku slæður eða hvað sem þetta var. Öll umgjörðin um keppnina var hins vegar mjög flott. Sviðið var frábært og tölvugrafíkin í kringum stigagjöfina flott.

Jæja, ætla að fara að finna mér eitthvað að borða. Er að spá í að fá mér ekta brasaðan þynnkumat. Er samt ekketr þunn - þetta tilheyrir bara :p

Jæja, þá er Eurovision dagurinn runninn upp. Ég píndi mig til að vaka og horfa á Ungfrú Ísland. Steinunn hans Hauks Inga vann - og kemur það svo sem ekkert á óvart. Þegar ég vaknaði í morgun fór ég inneftir að sækja Kristinn Breka. Við fórum saman í fjöruferð. Vorum að moka holur og skoða fuglana sem voru dauðir í fjörunni. Við komum líka við á flotbryggjunum hérna. Röltum á bryggjuna og skoðuðum bátana. Kidda fannst voða merkilegt að bryggjan skyldi vagga undir honum. Hann þorði samt ekki að labba alveg út á enda - vildi ekki detta í sjóinn. Þegar við röltum heim á leið komum við við í búðinni og keyptum laugardagsnammi fyrir hann og ís. Síðan fórum við heim og horfðum á Harry Potter. Klukkan þrjú spurði hann svo hvað klukkan væri - sem var merki um að hann vildi fara heim til mömmu. Þá skutlaði ég honum inneftir og dreif mig svo heim. Maður þarf að fara að hafa sig til fyrir djammið í kvöld. Ég var að fatta að ég hef ekkert djammað síðan á páskunum - og það er alveg mánuður síðan!! Þetta er nú afrek hjá mér því að það er alveg búið að vera eitthvað um að vera síðan. Ég hef bara ekkert nennt að fara neitt. Eins og ég var búin að segja ætlar Ella að koma og elda fyrir mig tacopizzu. Una var svo að segja mér hvernig ég ætti að búa til almennilegt guacamole og ég ætla að gera heiðarlega tilraun til þess að búa það til. Það er víst ekki hægt að klúðra þessu segir Una.. Ég vona bara að það sé rétt hjá henni! Eftir Eurovision ætlum við að öllum líkindum á Kaffi Ísafjörð. BMX verður að spila þar. Það er hljómsveit frá Ísafirði fyrir þá sem ekki vita. Nokkuð góðir bara.

Ég er komin í þvílíkan þjóðhátíðarfíling. Eyjadiskurinn er alltaf í græjunum og pylsudiskurinn í bílnum. Er meira að segja farin að spá í hvað ég eigi að gefa Kidda og Hildi fyrir gistinguna í ár og hvað ég geti komið með matarkyns í hvíta tjaldið. Sálin og Skítamórall verða að spila - sem verður algjört flashback á fyrstu þjóðhátíðina mína sem var ´97. Agga er reyndar ekki viss um að hún komi - en ég treysti bara á að hún verði komin með geggjaðan fiðring í sumar og reddi sér fríi í vinnunni ;) Hjördís ætlar að koma líka sem þýðir bara að það verður ennþá meira flashback!! Ég held ég hafi ekki djammað með neinum öðrum en henni ´97. Við vorum líka svo samstíga þá :p Smá einkaprivate..

Pétur vinur minn var að ræða um einkamál.is á síðunni sinni í vikunni. Mig langar bara að styðja hann í umræðunni og opinbera það að ég er líka með nikk inn á einkamál. Ég las nokkuð góða grein um einkamál í Skýjum einhvern tíman í vetur þegar ég var að fara suður. Stelpan sem skrifaði greinina gerði tilraun inn á einkamál. Bjó til þrjú nikk í mismunandi flokkum og kannaði viðbrögðin. Hennar niðurstaða var að einkamál.is væri einfaldlega þverskurður af samfélaginu. Þarna inni er öll flóran. Allt frá perrunum til góða gæjans í næsta húsi. Vissulega þarf maður að hafa ýmislegt í huga og ekki gleypa við öllu en meirihlutinn af liðinu er bara fólk eins og ég og þú og kemur heiðarlega fram. Mikið af liðinu er orðið þreytt á djammhöstlinu sem skilar manni oftast litlu. Enda held ég að maður finni sjaldnast framtíðarmakann á djamminu. Allavegana, þar hefurðu það Pétur. Ef liðinu finnst við skrýtin þá erum við bara skrýtin saman!!

Jæja, er að spá í að leggja mig aðeins áður en ég fer í sturtu og hef mig til fyrir djammið. Er alveg steindauð eitthvað í augnablikinu. Það hlýtur að koma með smá lúr og einum köldum! Góða skemmtun í kvöld folks!!

Það er eitt sem ég var að spá. Í kvöld er lokaballið hjá 8.-10. bekk. Skyldumæting er hjá 10. bekk á ballið þar sem á að krýna bekkinn, þ.e. upplýsa um niðurstöður kosninga á elsta stiginu. Kosið var um herra og ungfrú, ljóskuna, frekjuna o.s.frv. Þegar niðurstöðurnar voru komnar kom í ljós að ekki fá allir í bekknum einhvern titil. Sumir fá marga á meðan aðrir fá engan. Ég er eiginlega á móti svona vinsældakosningum. Hvað er verið að segja krökkunum með þessu? Ef maður er vinsæll í svona kosningum að þá gangi manni vel í lífinu?? Það er svo innilega langt frá því. Frekar myndi ég vilja sjá að félagsmiðstöðin í samvinnu við kennarana myndi velja titil á hvern og einn nemanda 10. bekkjar í kveðjuskyni. Ég ræddi þetta við Siggu sem er með félagsmiðstöðina og ég vona bara að þessu verði breytt á næsta ári. Það er ekki gaman fyrir liðið sem ekki fær neinn titil að mæta á ballið í sínu fínasta pússi og fara svo heim tómhentur. Sérstaklega þegar skyldumæting er fyrir hann á ballið þar sem á að krýna ALLA í bekknum samkvæmt auglýsingunni.

Ungfrú Ísland er að fara að byrja á Stöð 2. Það var í fréttunum áðan að femínistar vildu komast þar að og veita viðurkenningu. Mér fannst soldið fyndið að sjá að fulltrúi femínista í fréttunum var Beta, konan sem ég leigði hjá á tímabili í fyrravetur. Já eða var ódýr húshjálp fyrir - depends on how you look at it... Allavegana, þær vildu gefa keppendum bol sem á stóð Manneskja en ekki markaðsvara. Ég er svo sem ekkert voðalega hlynnt svona keppnum. Maður hefur heyrt það frá stelpum sem hafa tekið þátt í svona keppnum að til sé á þeim svört hlið sem lítið sé rædd. En ef að einhver vill hins vegar taka þátt í svona keppni þá er það hans mál. Maður fylgist þá bara ekkert með ef maður hefur ekki áhuga á þessu. Ég sé ekki alveg pointið að vera svo heittrúaður á móti svona keppnum að maður standi í svona. Fyrir utan það þá eru margar manneskjur markaðsvörur án þess að koma neitt nálægt fegurðarsamkeppnum. Ég meina, hvað eru leikarar, módel, söngvarar, sjónvarpsfólk jafnvel..

Annars held ég að það sé ábyrgð foreldra að ala upp þann metnað í börnunum sínum að þau hugsi um fleiri hluti en hvernig þau líta út. Það getur fleitt manni áfram að vera voða sætur en ef maður pælir ekki í neinu öðru og hefur lítið á milli eyrnanna þá er maður í slæmum málum. Femínistar ættu því að beina kröftum sínum annað að mínu mati. Fólk gleymir alltof oft þeim áhrifum sem það getur haft á heiminn með því að ala upp góð gildi hjá börnunum sínum. Kröftunum er oftar beitt á aðrar slóðir og börnin fá svo leifarnar ef þau eru heppin. Það er eiginlega ekkert skrýtið að agaleysi sé orðið svona mikið vandamál í skólakerfinu þegar maður horfir til þess hversu algengt er að foreldrar eyði litlum tíma með börnunum sínum. En ég ætla ekki að fara nánar út í þá sálma..

Er alveg að berjast við að halda augunum opnum og klukkan bara rétt rúmlega 10 á föstudagskvöldi... Er að spá í að vera öfga lummó og fara bara snemma að sofa..

Þá er maður bara nánast kominn í helgarfrí - og ekki einu sinni komið hádegi! Þarf að fara niðrí skóla aftur á eftir og fara yfir próf með Dóru Línu og þá er maður alveg komin í helgarfrí. Var með tvö próf í morgun sem gengu bara ágætlega. Enskan í 8. bekk gekk mjög vel en ég var ekki eins ánægð með dönskuna í 7.b. Greinilegt að þau lærðu ekki mikið fyrir prófið mörg þar. Dagný og Haukur kíktu aðeins í heimsókn með Kristinn Breka í gærkvöldi. Hann var orðinn ansi þreyttur greyið enda búinn að vera á þeytingi allan daginn. Ég fæ hann svo lánaðan á morgun. Ætli við þrífum ekki bílinn eða eitthvað álíka ef veðrið verður áfram svona gott.

Ég kláraði peysuna mína alveg í gær og mætti í henni í skólann í dag - alveg rosalega stolt!! Mömmu finnst að það eigi að ramma hana inn og hafa mynd af öllum sem hafa hjálpað mér með hana með. Það yrðu þá ansi margar myndir :p Næsta skref er að prjóna peysu á Öggu - hún þarf bara að skipta garninu sem ég á eftir í lit sem henni líst á og senda mér.

Fyrsti leikurinn í þriðju deildinni hjá UMFB var í gær. Við spiluðum á móti Ísafirði - og að sjálfsögðu unnum við!! Varð bara að koma því að :p

Ég var að klára að lesa í gær bókina um flótta mæðgnanna frá Egyptalandi. Þetta var ágætis lesning, mér fannst hún samt ekki nógu vel skrifuð. Málfarið í henni böggaði mig soldið á meðan ég var að lesa hana. Ég mæli samt með henni fyrir þá sem ekki hafa lesið hana. Hún gefur ágætis innsýn í heim araba. Honum er lýst á fordómalausan hátt sem er kannski merkilegt miðað við reynslu þeirra af honum. Svona bækur fá mann samt til að hugsa sig að minnsta kosti fimm sinnum um áður en maður tæki upp samband við araba. Ekki það að arabar séu verri en aðrir - en saga þessara mæðgna er bara ekkert einsdæmi og langt frá því.

Þá erum við loksins búin að fá að vita hvernig ný ríkisstjórn verður skipuð. Ég verð að viðurkenna að ég varð fyrir miklum vonbrigðum. Ég hefði viljað sjá uppstokkun á ráðuneytum á milli flokkanna, þ.e. meiri heldur en að var. En það þýðir víst lítið að röfla yfir því núna. Ég vona bara að það verði meiri breytingar eftir fjögur ár þegar næst verður kosið.

Jæja, ég ætla að fara að drífa mig heim og þrífa aðeins. Við Ella ætlum að hittast á morgun og horfa á Eurovision. Ella ætlar að elda tacopizzu. Hún er búin að lýsa þessu fyrir mér og þetta hljómar alveg rosalega vel. Svo er bara einn (já eða tveir eða þrír :p) kaldur með!

Jæja, þá eru rólegheitin byrjuð. Ég var með fyrsta prófið í morgun - íslensku í 9. bekk. Ágætt að sitja yfir prófi hjá þeim. Þau spurja nánast aldrei að neinu, það liggur við að maður geti dottað yfir þeim - sem er fínt þegar maður er þreyttur :p Ég er búin að fara yfir prófið og slá einkunnirnar inn í kerfið og er meira að segja búin að prjóna peysuna mína!! Á bara eftir að sauma saman undir höndunum og fela enda. Dóra Lína ætlar að kenna mér það á eftir. Hún ætlar svo að þvo hana fyrir mig þannig að það er ekki öll von úti með að ég verði komin í peysuna þegar að amma kemur heim. Dagný og Haukur komu vestur í gær og verða hérna yfir helgina. Maður þarf að reyna að hitta þau eitthvað. Ég er að spá í að athuga hvort ég geti ekki fengið Kristinn Breka lánaðann aðeins. Kolla verður svo hérna á næstu helgi með eitthvað af sínu liði þannig að það verður nóg að gera næstu helgar.

Jæja, ætla að fara að finna hana Dóru og klára þessa peysu. Við þurfum svo reyndar að fara yfir íslenskuprófið sem var í 7. bekk í morgun. Ætla svo að drífa mig út í góða veðrið, fara í gönutúr með gönguhópnum og fara svo jafnvel í sund.

Smá fréttir fyrir Kollu: Hafrún hans Sólbergs eignaðist strák rétt fyrir hádegi í dag. Hann var 20 merkur og 56 sentimetrar. Jóa (hennar Sínu) eignaðist stelpu á mánudaginn. Hún fæddist 8 vikum fyrir tíman og var 8 merkur og 46 cm. Heiða (hennar Soffíu Gumma Haffsa) eignaðist strák í morgun. Veit ekki hvað hann var stór.

Jæja, þá er maður hættur að kenna þessum gríslingum. Bara prófin eftir. Ég var að enda við að klára allt sem ég þurfti að gera fyrir prófin. Gera allar hlustanir og kennaraeintök. Núna eru allar spólur klárar og allt tilbúið þannig að næsta vika fer bara í að fara yfir próf og ganga frá dótinu mínu. Ég verð að prjóna á fullu í kvöld. Þurfti að rekja fullt upp í gær - þegar ég var nánast búin með peysuna því hún passaði ekki alveg yfir axlirnar. Ég er samt komin langleiðina með að prjóna þetta, ætla að sjá hvað ég kemst langt í kvöld. Ég ætlaði nefnilegast að vera búin með peysuna þegar að amma kæmi heim - en hún kemur heim á föstudaginn þannig að ég veit ekki alveg hvort það náist. Ég reyni allavegana!

Það er frétt inn á bb að það sé búið að kæra manninn sem lenti í slysinu á Kirkjubólshlíðinni í haust fyrir manndráp af gáleysi. Hann ók bílnum, en með honum var konan hans og tvær stjúpdætur sem allar létust í slysinu. Í fyrra var strákur í Súðavík líka kærður fyrir manndráp af gáleysi en hann fór út af og einn vinur hans, sem lá sofandi í aftursætinu, dó. Ég veit ekki alveg hvað löggan á Ísafirði er að spá. Er það ekki nóg refsing fyrir fólkið að hafa misst sína nánustu í slysinu?? Og að þurfa að lifa með því það sem eftir er? Þarf að kæra það líka?!??! Ég er ekki alveg að ná svona vinnubrögðum....

Jæja, þarf að drífa mig heim. Á að vera mætt í gönguhópinn kl. 6. Var að spá í að hlífa hnénu og fara bara á morgun en það er bara svo gott veður að ég ætla barasta að drífa mig. Þarf að fá frískt loft eftir að vera búin að sitja inni í allan dag!

Þá er maður búinn í göngutúrnum. Við gengum 3,8 km samkvæmt göngumælinum hennar Ellu. Hnéð á mér var ekki alveg að meika svona rösklega göngu og sit ég því með kælipokann á því núna. Það var samt hressandi að drífa sig svona út. Þarf bara að vera dugleg að því í sumar svo ég þurfi ekki áfram að nota svona stór númer ;)

Ég kom við á bókasafninu á leiðinni heim. Tók bókina þar sem er verið að lýsa flótta mæðgnanna frá Egyptalandi. Man ekki alveg hvað hún heitir. Ætti að vera fróðleg lesning. Fékk síðan að grípa nýjasta Mannlíf með mér heim. Þar var frekar áhugaverð grein sem fjallaði um framhjáhaldsbörn. Í kjölfarið á greininni var viðtal við konu sem eignaðist barn með giftum manni og svo eiginkonu mannsins. Dæmið var víst þannig að gaurinn hitti gelluna í vinnupartýi og þau fóru saman heim. Ekkert meira varð síðan úr því. Gellan kemst svo að því að hún er ólétt og lætur gaurinn vita. Hann brotnar saman fyrir framan konuna sína og segir henni að hann eigi von á barni með annarri konu og segir henni alla sólarsöguna. Hún reynist vera svona líka skilningsrík, fyrirgefur framhjáhaldið og barnið er hluti af familíunni í dag. Það voru tekin viðtöl við konurnar sitt í hvoru lagi. Viðhaldið fékk náttúrulega frekar mikið sjokk þegar hún komst að því að hún væri ólétt, en þar sem hún hafði áður haldið að hún gæti ekki átt börn þá kom ekki annað til greina en að eiga barnið. Sem maður getur svo sem skilið. Hún lætur gaurinn vita og þá berst sagan til konunnar hans. Það sem vakti athygli mína í viðtalinu við hana þá taldi hún þau vera fullkomlega hamingjusöm þegar framhjáhaldið átti sér stað og fyrst á eftir var hún í því að hugga hann og telja honum trú um að hún væri ekkert að fara neitt. Hún tekur þá skynsamlegu (en sjaldgæfu) afstöðu að það sé ekki barninu að kenna hvernig það varð til og fer með manni sínum að sjá barnið þegar það er nýfætt. Þau taka barnið eins og þau geta í dag og það er hluti af þeirra fjölskyldu. OK, ég dáist að því þegar fólk getur sýnt þann þroska að taka barninu og láta það ekki gjalda fyrir það sem fullorðna fólkið hefur gert. Það er alltof sjaldgæft að fólk geti sett hagsmuni barnanna ofar sínum eigin í svona málum. Ég hef hins vegar mikið pælt í því hvað fólk sé að hugsa sem fyrirgefur framhjáhald. Var konan í þessu dæmi hérna fyrir ofan að meta dæmið rétt að hún og maðurinn hennar væru hamingjusöm? Ég meina, ef maður er hamingjusamur í sambandi fer maður þá og sefur hjá einhverjum öðrum?? Setur maður þá ekki ákveðnar spurningar og endurmetur stöðuna ef svona kemur upp? Kannski gerði þetta fólk það og mér kemur það náttúrulega ekkert við, en ég hef bara aldrei skilið hvernig fólk getur fyrirgefið framhjáhald. Í mínum huga er ekki hægt að brjóta traust annarrar manneskju meira og þó svo maður gæti kannski fyrirgefið manneskjunni með tíð og tíma þá væri samt grundvöllur sambandsins horfinn. Ég held nefnilegast að maður fyrirgefi framhjáhald aldrei alveg ef maður heldur sambandinu áfram. Jú, maður segist vera búinn að því en hvað ef makinn skilar sér ekki heim á réttum tíma eða eitthvað álíka? Hvað væri það fyrsta sem manni kæmi í hug? Jú, ekki skyldi hann vera að... Það þarf mikið til að endurvekja traustið en alveg óskaplega lítið til að brjóta það allt niður aftur. Maður elskar manneskjuna kannski ennþá - enn stundum er það bara ekki nóg.. En jæja, ég ætla ekki að vera að velta mér upp úr annarra manna vandamálum. Ég hef bara alltaf velt þessu mikið fyrir mér. Held að ég gæti aldrei fyrirgefið svona lagað..

Jæja, bara tveir kennsludagar eftir! Ég náði að klára bæði sérprófin sem ég þurfti að semja áðan og er langt komin með enskuprófið fyrir 8. bekk. Þá ætti ég að ná að klára allt á morgun og þá þarf ég bara að fara yfir prófin í prófavikunni og ganga frá bekknum mínum. Ef það gengur upp á ég frí á helginni og allt!! Best að njóta þess í botn því það verður langt þangað til að ég á eftir að eiga almennilegt frí á helgi. Byrja líklegast að vinna á Skýlinu á Sjómannadaginn - og verð að vinna í skólanum 31. maí. Næstu viku á eftir á ég eftir 4 daga í skólanum, en verð þá bara að vinna á báðum stöðum þá vikuna. Það ætti varla að vera mikið mál.

Ég var að sjá það á bb.is að það verður engin hátíðardagskrá vegna Sjómannadagsins á Ísafirði í ár. Hvað er eiginlega í gangi???? Alveg frá því að ég man eftir mér hefur þetta verið einn stærsti hátíðisdagur ársins. Ennþá klæðir maður sig í betri föt á Sjómannadaginn og fer niðrá bryggju að fylgjast með hátíðahöldunum og í kaffi í Slysavarnarhúsinu á eftir. Það er alveg hræðileg þróun ef hætt verður að halda upp á þennan dag - og það á Ísafirði af öllum stöðum. Ástæðurnar sem gefnar eru upp eru að mikið tap hafi verið af Sjómannadeginum í fyrra og ekki sé áhugi fyrir því hjá sjómönnum að halda daginn hátíðlegan. Ég er bara ekkert að skilja þetta.

Jæja, er algjörlega tóm í haus. Ætla að drífa mig út í búð og finna mér eitthvað að borða. Ætla svo að fara í göngutúr með gönguhópnum í kvöld.

Jæja, þá er nú orðið langt síðan ég bloggaði seinast. Ég náði að klára fimm próf fyrir helgina og ætla að klára restina á morgun og hinn. Ég fór suður á föstudaginn. Kíkti aðeins með mömmu á Players á föstudagskvöldið. Var að keyra hana. Það var alveg ágætt. Hitti Axel og Sigurborgu. Á laugardeginum fór ég svo í búðir!! Keypti mér samt ekkert mikið. Ég keypti mér boli í Zöru og nærföt í Debenhams. Ætlaði að kaupa mér buxur í Zöru líka en lenti í algjörum vandræðum með að finna eitthvað sem passaði. Endaði í Gallabuxnabúðinni í dag og fékk þar fínar buxur. Rakel var alveg að eyðileggja sjálfstraustið mitt þegar umræðan kom að þeim fötum sem ég passa ekki í lengur. Hún sagði að ég væri ekkert feit - ég notaði bara stórt númer! That didn´t excactly make my day... Í gærkvöldi fór ég svo í laaangt bað heima hjá mömmu. Var svo alveg húðlöt á eftir og nennti engu. Lá bara upp í sófa með mömmu og horfði á sjónvarpið. Það var alveg frábært. Vaknaði svo í hádeginu til að horfa á formúluna. Raikkonen stóð fyrir sínu eins og svo oft áður. Coulthard greyið kláraði allavegana.

Þá á maður bara eftir að kenna í þrjá daga. Þá er prófavikan eftir og síðan á maður ekkert eftir að hafa af þessum gríslingum að segja. Á vissan hátt verður maður fegin en samt á maður eftir að sakna þeirra. Mér finnst ég eiga pínu í þeim öllum. Það verður allavegana gaman að fylgjast með þeim í framtíðinni! Sjá hvort að maður hafi haft einhver áhrif á þau.

Mér fannst það öfga fyndið þegar ég sá það á bb.is að gaurinn sem hefur verið í fangelsi í Saudi Arabíu (minnir mig) fyrir ólöglegan vopnaburð sé Ísfirðingur. Eitthvað svo týpískt fyrir Ísfirðing að lenda í einhverju svona :p

Það var í fréttunum á helginni að Kvenréttindafélag Íslands sé mjög ósátt með útkomu kvenna úr kosningunum. Það skipti öllu máli að hafa fleiri konur á listum flokkanna t.d. með notkun fléttulista. Fyrir þá sem ekki vita hvað það er þá er það þegar konu og karli er raðað til skiptis í sæti á listanum. Ég verð að viðurkenna að ég var ekki alveg sammála þeim. Vissulega komu konur illa út - en það var heldur ekki mikið framboð af hæfum konum yfir höfuð! Ég er algjörlega á móti þeim áróðri sem Samfylkingin t.d. rak um það að maður ætti að kjósa konu - og aðalástæðan fyrir því að þú ættir að kjósa hana var að hún væri kona. Þær ættu frekar að beina áróðri sínum að konum - að fá hæfar konur til að fara út í pólitík! Ég tala nú ekki um ungar, hæfar konur. Það er sá hópur sem við þurfum virkilega að fá inn á þing. Annars var ég ánægð með útkomu ungliða á kosningunum - í öllum flokkum. Það var alveg kominn tími á að lækka meðalaldurinn á þinginu. Það verður gaman að sjá hvernig þau eiga eftir að standa sig.

Alveg er ég ekki að ná gaurnum sem rændi bankann í vikunni. Hafði ekki einu sinni fyrir því að setja á sig grímu! Stupid people!! Svo var hann með yfir hausnum á sér í fréttunum þegar búið var að sýna myndir af honum í öllum fjölmiðlum. Fram að þessu ári hafði löggan aldrei upplýst bankarán á Íslandi þannig að maður beið bara eftir því að einhver klár pældi allt dæmið út og drifi í því að ræna eins og einn banka. Ég verð samt að viðurkenna að ég bjóst ekki við annarri eins heimsku og þarna. Greyið strákurinn hlýtur að hafa verið á einhverju.

Það er eitt sem ég bara verð að deila með ykkur. Ég fór í Debenhams í gær til að kaupa mér brjóstahaldara. Þar fær maður ráðgjöf um hvaða stærð maður þarf og fær líka almennilega haldara á viðráðanlegu verði. Ég labba þarna inn og bið um aðstoð. Konan spyr mig hvaða númer ég noti og ég segi 34B. Hún horfir þá bara á mig og segir nei það gerir þú ekki. Hún byrjaði á að koma með C- haldara INN Í mátunarklefann. Ég stóð þarna eins og hálfviti á brjóstunum og var að fara að máta einhvern haldara þegar konan kom bara inn og fór að klæða mig í! Pínu vandræðalegt. En allavegana, C-haldarinn passaði ekki og ég labbaði út með D-skálar!! Ég!! Sem hefur alltaf fundist ég vera með svo lítil brjóst!!! En ég get víst ekkert þrætt við kelluna - brjóstahaldarinn er alveg rosa flottur og smell passar!

Jæja, ætla að fara að prjóna aðeins áður en ég fer í háttinn. Ætla bara að minna alla á að skrifa í gestabókina!!!

Núna er ég alveg búin á því. Búin að tala við meirihlutan af foreldrunum í umsjónarbekknum mínum í dag og í gær. Það tekur gjörsamlega úr manni allan kraft þegar svona vesenismál - ef hægt er að orða það þannig - koma upp. Ætla samt að reyna að semja meirihlutan af prófunum fyrir helgina. Ég pantaði mér far suður áðan, ætla að fara suður á föstudaginn og vestur á sunnudaginn. Verð bara aðeins að koma mér héðan í burtu. Langar að eiga smá stund þar sem enginn er að fylgjast með því sem ég er að gera eða að blaðra um það. Er ekki alveg að sjá fram á það í augnablikinu að ég meiki að vera hérna í sumar, en það hlýtur að reddast. Maður er allavegana ekki að taka vinnuna á Skýlinu með sér heim og ekki verið að hringja í mann á ótrúlegustu tímum sólarhringsins út af vinnunni. Maður verður bara að vera duglegur að þrauka síðustu kennsludagana, þá er mesta álagið búið. Í prófavikunni þarf maður bara að fara yfir prófin og ganga frá dótinu sínu. Þá fer maður að sjá fyrir endann á allri þessari vinnu. Það er kannski ekkert skrýtið að maður sé búinn á því eftir að hafa verið í svona mikilli vinnu í allan vetur - það væri lúxus ef maður væri bara að kenna 100%!! Já og væri að kenna það sem maður væri virkilega góður í.. Er búin að vera að skoða íslenskupróf og er ekkert að sjá hvernig ég eigi að klambra saman almennilegum prófum fyrir 8. og 9. bekk. En þetta reddast víst alltaf á endanum...

Ég er búin að vera ekkert smá dugleg í dag! Er búin að búa til upprifjunarverkefni í dönsku fyrir bæði 7. og 8. bekk, ganga frá upprifjunarverkefnum í ensku fyrir alla bekkina og íslensku líka. Einn strákurinn í 7. bekk gaf mér skrifaðan geisladisk þegar hann var að fara heim úr skólanum. Hann fór með mér að sækja pizzurnar inneftir í seinustu viku þegar þau komu heim til mín og mislíkaði eitthvað tónlistin sem var í bílnum. Ég var með SS-pulsudiskinn í - er komin í nettan þjóðhátíðarfíling þó svo það sé bara maí :p Þetta er nú samt ágætis diskur hjá honum. Ég setti hann í tölvuna, náði mér í headphones inní tölvustofu og er svo bara búin að vera að vinna á fullu. Er að vona að ég geti verið búin að semja öll prófin fyrir helgi. Það ætti nú að takast ef ég verð í svona vinnustuði. Ég þarf samt eiginlega að semja 4 próf á morgun - hmm, æi það hlýtur að reddast. Næstum öll enskuprófin - það er nú minnsta málið!

Jæja, ætla að fara að drífa mig út í góða veðrið. Þarf að fara til ömmu og ná í peysuna sem ég er að prjóna. Ég þurfti að rekja fullt upp í gær :( Ekki gaman. Amma fer svo suður í fyrramálið. Hún, Bogga og Illa (systur hennar) ætla að keyra saman suður í ömmubíl. Það verður eflaust nettur taugatitringur hjá familíunni að vita af þeim kellingunum á þjóðveginum - en þær hljóta að bjarga sér. Amma og Illa keyrðu þetta í fyrra og þeim gekk bara vel - voru bara rétt 6 tíma! Amma er svo að fara til Köben ásamt öllum systkinum sínum að heimsækja Heiðu systur þeirra sem býr þar. Ég verð því bara ein í kotinu á meðan og lifi væntanlega á samlokum, örbylgjumat og fleiru hollu og uppbyggilegu :p En jæja, 8. bekkur á að mæta heim til mín kl hálf 8 og ég á eftir að fara til ömmu. Verð að drífa mig..

Þá er maður vaknaður eftir langa nótt. Ég fór að sofa kl hálf 7 en þá var ekkert útlit fyrir að lokatölur væru neitt á leiðinni. Það reyndist vera skynsamlegt hjá mér því úrslitin urðu ekki ljós fyrr en hálf 10 í morgun. Það kom mér soldið á óvart að Stöð 2 cuttaði á kosningasjónvarpið hjá sér um fjögur leytið. Þrátt fyrir að Elín og Bogi væru skrautleg - sérstaklega undir restina þegar það var kominn svefngalsi í þau bæði - þá vann RÚV kosningasjónvarpsstríðið. Mjög lame hjá Stöð 2 að klára ekki kosningarnar.

Úrslitin breyttust nú eitthvað eftir að ég fór að sofa. Samt ekki hérna í Norð-Vesturkjördæmi. Greinilegt var að atkvæðunum var ekki ruglað saman áður en þau voru talin. Frjálslyndir komu sterkir inn undir restina þegar Vestfjarðaatkvæðin voru talin. Ingibjörg Sólrún er úti sem kemur kannski ekki mikið á óvart. Það sem mér finnst vera stórtíðindi kosninganna er hvað íhaldið tapar miklu. Jú vissulega mátti búast við því - en að þeir tapi fyrir Samfylkingunni í Reykjavík Norður, sem er höfuðvígi Davíðs, eru stórtíðindi. Þó svo að stjórnin haldi velli þá er erfitt fyrir Davíð að ætla að leiða ríkisstjórn áfram þegar hann nær ekki að vera fyrsti þingmaður í sínu kjördæmi.Einnig er mikið áfall fyrir Tómas Inga Olrich og Halldór Blöndal að ná ekki betri árangri. Ráðherra og Forseti þingsins.. Þeir fengu margar útstrikanir líka sem er ekki gott. Framsókn heldur hins vegar nokkurn vegin sínu kjörfylgi og á því meira erindi í ríkisstjórn heldur en íhaldið. Það er í raun mikill sigur fyrir Framsókn að halda sínu eftir 8 ára stjórnarsetu með mörg af óvinsælustu ráðuneytunum. Sérstaklega þar sem sagan sýnir að flokkar tapa venjulega mikið á því að vera í stjórnarsamstarfi við Sjálfstæðisflokkinn á meðan að þeir halda sínu. Núna er þessu eiginlega öfugt farið. Vinstri grænir eiga lítið erindi í ríkisstjórn. Þeir eru búnir að vera í stjórnarandstöðu og tapa manni - sem er mjög lélegt fyrir stjórnarandstöðuflokk. Ég sé hins vegar ekki fyrir mér að Halldór og Össur myndi saman stjórn með Frjálslyndum. Eini ráðherrastóllinn sem kæmi til greina fyrir þá er sjávarútvegsráðherrann - og ég sé alls ekki fyrir mér að Framsókn og Samfylking sætti sig við Adda Kitta Gau sem sjávarútvegsráðherra. Núverandi stjórnarflokkar eiga vafalaust eftir að spjalla saman - enda verður engum gefið stjórnarmyndunarumboð fyrr en gamla stjórnin hefur endanlega verið afskrifuð. En miðað við útkomu íhaldsins þá verður varla áframhaldandi stjórn. Þá er eiginlega orðin spurning hvort að Framsókn og Samfylking myndi stjórn. Þó svo hún byggist bara á eins manns meirihluta þá gæti það verið betra heldur en að taka Vinstri græna eða Frjáslynda inn til að tryggja stærri meirihluta. Það ætti allavegana að vera auðveldara fyrir þessa tvo flokka að ná saman málefnalega séð og því minni líkur á að ágreiningur komi upp. Fyrir utan það að svona tæpur meirihluti gæti ýtt undir það að málin yrðu bara einfaldlega betur unnin því það væri ekki eins auðvelt að keyra þau í gegnum þingið. En þetta skýrist nú allt á næstu dögum.

En jæja, þá getur maður farið að snúa sér að einhverju öðru en þessum blessuðu kosningum sem eru búnar að vera allsráðandi undanfarna mánuði. Ég ætla að drífa mig í sturtu og fara svo niðrí skóla að vinna aðeins. Síðan ætla ég til ömmu og prjóna eins og mest ég má. Reyna að klára eins mikið og ég get áður en að amma fer suður á þriðjudaginn. Síðan tekur bara við vinna og meiri vinna. Þarf að semja 7 próf í vikunni og finna heilan helling af upprifjunarverkefnum. Það verður því lítið líf næstu vikuna. Ætla mér að vera búin að þessu öllu á næstu helgi. Ætla mér bara að vera í frágangsvinnu og yfirferð á prófum í prófavikunni. Vona bara að ég nái því! Síðan verð ég að fara að tala við Huldu Karls um hvenær ég á að byrja á Skýlinu - best að reyna að gera það á morgun.

Jæja, þá er langt liðið á kosninganótt. Framsókn er bara að koma vel út, ég fylgist samt spennt með því hvort að Herdís, þriðji maður Framsóknar hér í NV-kjördæmi, komist inn. Það er raunhæft - bara spurning hvar jöfnunarmaður Framsóknar lendir. Hann er búinn að vera að flakka á milli kjördæma. Sjálfstæðisflokkurinn kemur illa út. Kosningavökur þeirra hérna fyrir vestan voru víst næstum eins og líkvökur. Það er mikið áfall fyrir Davíð að vera ekki 1. þingmaður Reykjavíkur norður - sem átti að vera höfuð vígi íhaldsins. Spurning hvað kallinn gerir. Ég hef enga trú á að hann fari að vinna í stjórnarandstöðu í þinginu ef íhaldið fer ekki í stjórn. Hann hættir þá frekar - annað hvort fljótlega eða á kjörtímabilinu. Samfylkingin er að koma vel út - sérstaklega hjá Stjána Möller í Norð-Austurkjördæmi. Mér finnst frábært að sjá hvað hann er að standa sig vel. Hann ætti að eiga tilkall til ráðherrastöðu ef Samfylkingin fer í ríkisstjórn. Vinstri grænir eru að tapa. Það kemur mér sérstaklega á óvart að sjá að þeir tapa í heimakjördæmi Steingríms. Þeir koma samt ágætlega út hér í NV-kjördæmi. Jón Bjarnason er t.d. 7. þingmaður kjördæmisins - er fyrir ofan Adda Kitta Gau sem maður hefði nú haldið að hefði meira fylgi en Vinstri grænir hér.. Það hefur komið flestum á óvart. En Frjálslyndir hafa verið að tapa fylgi seinustu daga, Addi hefur ekki alveg verið að meika pressuna og klikkað á að heilla sjóarana. En þó svo að klukkan sé orðin fjögur og talningu lokið í þremur kjördæmum er þetta langt frá því að vera orðið ljóst. Norð-Austurkjördæmi ætti að klára sitt fyrir 5, spurning hvort að Norð-Vesturkjördæmi nái að klára fyrir þann tíma. Stóra spurningin er eiginlega Suðurkjördæmið. Það komu tölur þaðan á milli 10 og 11 og síðan hefur ekkert heyrst. Það gæti breytt stöðunni talsvert þar sem aðeins var búið að telja lítinn hluta atkvæða þar þegar fyrstu tölur komu.

Ég hef fylgst með kosningasjónvarpinu á RÚV. Elín Hirst og Bogi Ágústsson eru alveg hræðileg. Vita ekkert hvað þau eru að gera. Þau eru alltaf að fylgjast með vaktinni - sem er yfirlit yfir valda einstaklinga, hvort þeir séu inni eða ekki. Þau fylgjast hins vegar ekkert með því hvernig jöfnunarsætin breytast. Sem væri í raun og veru lógískara því þar eru breytingarnar. Það er mikil hreyfing á þeim og þó nokkrir sem skiptast á að vera inni og úti. Svo kunna þau ekkert á kosningakerfið sitt. Voru ekkert að geta útskýrt það í byrjun kvöldsins. Bogi er svo duglegur að láta út úr sér afar mis gáfulega hluti og Elín hlær og hlær að honum. Hálf vandræðalegt að fylgjast með þeim greyjunum. Annað slagið hefur verið skipt yfir á Stöð 2 þar sem Árni Snævarr hefur verið á álíka plani og Bogi með mis góð komment. Vorum ekki alveg að festa athyglina þar.

Jæja, ætla að klára að horfa á kosningasjónvarpið og sjá hvernig þetta fer allt saman áður en ég tjái mig eitthvað meira um þetta.

Ég kíkti inneftir áðan á fjölskylduhátíð Framsóknar á Silfurtorgi. Ætlaði að fara og fá mér pulsu og grænan ís í góða veðrinu. En nei nei. Ég gaf fullt af liði ís... Ég gaf fullt af liði fána.. En ég fékk engan ís og enga pulsu. Það er víst svona að eiga stjórnmálamenn fyrir foreldra. Maður hefur verið nýttur í allan fjandann í gegnum tíðina - oftast launalaust. Það hefur nú samt minnkað undanfarin ár. Pabbi hefur ekki einu sinni verið með áróður á mig í þessari kosningabaráttu. Enda hugsa ég að ég hefði ekki kosið hann ef hann hefði gert það.

Anyways, skoðanakannanirnar núna eru almennt góðar fyrir Framsókn. Baráttan hér í Norðvesturkjördæmi snýst um að ná þriðja manninum inn. Það er alveg raunhæft - en samt er engann veginn hægt að sjá fyrir um þetta. Íhaldið, Samfylkingin og Framsókn eru eiginlega hnífjöfn hérna. Einar Oddur er víst úti samkvæmt nýjustu könnunum og íhaldið byrjað með hræðsluáróðurinn. Ég held að það sé spurning um hvernig þeir og Framsókn spila úr seinasta sólarhringnum hvernig þetta fellur. Kannski verður Einar Oddur inni - og kannski Herdís hjá Framsókn. Framsókn hefur reyndar aðeins betri stöðu heldur en íhaldið - þeir þurfa ekki að vera í hræðsluáróðri. Íhaldið var að dreifa miðum í hús áðan þar sem eini boðskapurinn var að halda Einari Oddi á þingi. Það stóð ekkert annað á miðanum.. Nær varla til þeirra sem ekki hafa kosið íhaldið hingað til. Spurning með þá sem hafa kosið þá, hversu vinsæll Einar Oddur er. Bolvíkingarnir vita að Einar Kristinn er öruggur inn. Ég hugsa að það sé nóg fyrir þá. En íhaldið á alltaf sitt fasta fylgi, það verður því fróðlegt að sjá hvort þeir nái til þess fólks á lokasprettinum. Ég ráðlagði pabba að stíla lokabaráttuna inn á það að fólk væri að kjósa Vestfirðinga á þing. Ekki að fara inn á þetta kjósa konu kjaftæði. Mér til mikillrar undrunar var farið að mínum ráðum og dreifibréf sent í hús í gamla Vestfjarðakjördæminu þess efnis að með því að kjósa Framsókn ætti fólk möguleika á því að fá inn tvo Vestfirðinga sem þingmenn og einn varaþingmaðurinn yrði Ísfirðingur. Það verður fróðlegt að sjá hvort að ég sé að lesa dæmið rétt og þetta virki.. Samfylkingin hefur verið að nota konutaktíkina hérna. Þetta er algjört karlakjördæmi og þeir vilja meina að þú verðir að kjósa Samfylkinguna til þess að fá konu á þing fyrir kjördæmið. Þetta dreifibréf fór beint í ruslið hjá mér. Ég hef engann sérstakann áhuga á því að sjá konu á þingi fyrir þetta kjördæmi - eða nokkuð annað ef því er að skipta - sem er kjörin eingöngu vegna þess að hún er kona. Ég vil sjá hæfa einstaklinga sem berjast fyrir tilvistarrétti okkar Vestfirðinga.

Í augnablikinu er seinasti umræðuþátturinn fyrir kosningar. Formenn flokkanna - og Ingibjörg Sólrún - á báðum rásum. Ég byrjaði nú á því að hlusta en gafst upp á því. Maður veit alveg hvað liðið segir. Ingibjörg og Davíð eru langt frá því að vera málefnaleg í sinni umræðu, eru eins og litlir krakkar að reyna að skjóta hvort á annað. Steingrímur er alltaf góður í svona þáttum - en hann er samt voðalega einn á báti eitthvað þarna. Halldór er að koma ágætlega út. Enda er hann í ágætri stöðu, hefur í raun engu að tapa. Davíð er að missa sig í hræðsluáróðri - eins og íhaldinu er von og vísa. Nýtt afls gaurinn er nú alveg allt í lagi. Mesta furða alveg. Hugsa samt að hann veiði ekkert mörg atkvæði út á þetta. Addi Kitta Gau er bara þarna. Hann er aldrei góður í svona þáttum. Enda er hann enginn stjórnmálamaður. Hann ætti bara að drífa sig aftur á sjóinn.

Well, Friends er byrjað. Er að spá í að fara út á sjoppu þegar Friends er búið og koma mér vel fyrir. Er bæði með About a Boy á DVD sem ég þarf að horfa á - og Cold Feet þáttinn síðan á miðvikudaginn. Fékk hann lánaðann hjá einni stelpunni í bekknum mínum í dag :P Svo bara snemma að sofa, föstudagur í mér.

Jæja, kominn föstudagur og veðrið er alveg frábært!! Soldið kalt - en sól og bara alveg yndislegt veður. Ég fór með 8.bekk upp á Skeiði í leiki. Það var svaka gaman. Ég lét þau fara í þrautakóng á leiðinni upp á Skeiði. Smá mál fyrir sumar gelgjurnar að láta pínu eins og fífl en það kom eftir smá stund. Síðan fórum við í Stórt skip og lítið skip og Dimmalimm. Svo enduðum við á því að fara í actionary og löbbuðum svo fram í hesthús og í skólann. Alveg frábært. Núna ætla ég að fara að drífa mig inneftir að versla með ömmu. Fara jafnvel í grill hjá Framsókn og fá mér pulsu.

Kolla var eitthvað að kvarta við ömmu að ég væri hætt að setja hérna inn hvað hún gæfi mér að borða. Í gærkvöldi hrærði amma fyrir mig ekta Ísafjarðarskyr og það borðaði ég með kaffirjóma af bestu lyst! Um daginn fékk ég hjörtu - algjört sælgæti. Svo var amma með fiskirönd og spaghetti í fyrradag. Amma er soldið hrifin af spaghetti held ég - hefur það með ólíklegustu hlutum! Í kvöld kemur 7. bekkur til mín að horfa á Harry Potter. Þau ætla að fá að panta pizzu þannig að ég fæ pizzu í kvöld.

Anyways, bara tveir dagar til kosninga. Framsókn var að opna kosningaskrifstofu hérna í Bolungarvíkinni í gærkvöldi. Ég ætlaði bara aðeins að kíkja. Settist niður með prjónana mína og sat þangað til að ermin var tilbúin. Það var að koma út ný Gallupkönnun fyrir Norðvesturkjördæmið og Framsókn er að koma svona líka vel út. Pabbi yrði kjördæmakjörin og næsti maður inn er þriðji maður Framsóknar. Vantar innan við hundrað atkvæði til að koma henni að. Gísli S. myndi þá detta út á móti og spurning hvað yrði með Jón Bjarnason hjá Vinstri-Grænum en hann er uppbótarmaður samkvæmt könnuninni. Þessi könnun er ekki alveg í samræmi við þá sem var á landsvísu. Ég er að vísu ekki alveg að kaupa þá könnun. Svarhlutfallið er ekki nema 66%- og venjulega er talið að svarhlutfall þurfi að vera yfir 70% til að könnun teljist marktæk. Ég er því ekki viss um að þessi 6% fylgisaukning Samfylkingarinnar sé raunveruleg. Annars held ég að það verði ekkert hægt að sjá fyrir um þetta fyrr en talið verður upp úr kjörkössunum. Annars finnst mér soldið fyndið að sjá hvað Íhaldið er orðið hrætt. Staðan hjá þeim er ekki góð. Fólk virðist búið að vera fá nóg af hrokanum í Davíð. Enda er hann ekki beint að koma vel fyrir finnst mér þessa seinustu daga fyrir kosningar. Halldór virðist hins vegar allur vera að koma til. Magga Frímanns finnst mér líka koma vel út. Hún tók alla gaurana í nefið í Íslandi í dag á þriðjudaginn. Addi Kitta Gau hefur ekki verið að standa sig vel. Er ekki góður í að svara fyrirspurnum og þess háttar - sem er ekki gott. Hann kemur sér alltaf einhvern vegin undan því að svara. Fyrir utan það að fyrsti maður Frjálslyndra í Suðurkjördæmi sagði það í Íslandi í dag að þeir væru ekki búnir að mynda sér stefnu í heilbrigðismálum.. Ekki beint traustvekjandi að heyra svona frá stjórnmálaflokki nokkrum dögum fyrir kosningar... Svo var Pétur að minnast á Nýtt afl... Ég veit ekki um neinn sem hlær ekki að því framboði.. Hildur Helga með geiflurnar sínar... Ja, það væri allavegana stuð fyrir Spaugstofuna ef hún færi á þing!! Spurning samt hver gæti leikið hana :p

Svakalega var ég hneyksluð í fyrra kvöld þegar var verið að fjalla um málefni forstjóra ÚA. Að maðurinn skuli leyfa sér að senda svona bréf á alla starfsmenn fyrirtækisins. Enda var ég ánægð að heyra að Dagsbrún (minnir mig) og ASÍ hefðu ályktað um þetta mál. Segja að þetta sé brot á vinnulöggjöfinni. Ég þekki hana nú reyndar ekki - en það getur bara ekki verið að svona bréfaskriftir séu löglegar! Hvurs konar lýðveldi búum við þá við?? Maðurinn hefur vettvang í fjölmiðlum til að tjá sínar skoðanir - að senda svona innan fyrirtækisins er fáránlegt!!

Rosalega fannst mér gaman að heyra að Pétur vinur minn hefði farið á kosningafund. Ég þoli ekki þegar fólk kýs bara út í bláinn. Ef það hefur enga skoðun á málunum á það bara að skila auðu - ekki að kjósa eins og einhver annar segir því að gera. Málefnalega séð er ég mest sammála Framsókn - skv afstada.net - en ég reyndar fer ekki bara eftir málefnunum þegar ég er að ákveða hvað ég ætla að kjósa. Ef ég hef enga trú á fólkinu sem er í framboði - þá náttúrulega kýs ég ekki flokkinn!!

Jæja, ég er algjörlega tóm í haus. Þessar kosningar eru algjörlega að gera mig sambandslausa. Verð bara að reyna að vinna á sunnudaginn og svo fram á kvöld alla næstu viku.... That´s my life folks! Ætla að fara með prjónadótið til ömmu og taka aðeins til heima hjá mér áður en að liðið kemur.

I am drowning in work right now!! Ætla mér að reyna að skila af mér ritgerðum á föstudaginn þannig að ég er að klára að gefa fyrir þær. Er síðan á fullu að finna til upprifjunarverkefni fyrir krakkana - þar sem það eru bara tvær kennsluvikur til prófa. Síðan er ég farin að búa til próf í huganum - þarf að fara að koma því á blað. Svo langaði mig svo að leyfa krökkunum að horfa á Harry Potter 2 á DVD en það var ekki alveg að vinnast tími til þess. Þannig að ég samdi við þau að ég myndi búa til ritunarverkefni upp úr myndinni sem yrði þá æfing fyrir próf en í staðin fyrir frí myndu þau fá að koma heim til mín til að horfa. 7. bekkur kemur örugglega annað kvöld og 8. bekkur á mánudagskvöldið. Í kvöld er svo verið að opna kosningaskrifstofu Framsóknarflokksins hér í bæ - þannig að ég býst við að ég muni láta sjá mig þar. Svo er ég náttúrulega á fullu að prjóna. Er búin með bolinn og aðra ermina. Amma var eitthvað að reyna að fikra sig fram úr leiðbeiningunum með úrtökuna á erminni í gær. Vona bara að það hafi heppnast vel þannig að ég geti byrjað á hinni erminni í dag. Langar að klára peysuna áður en að amma fer út í næstu viku. Jæja, ætla að drífa mig snöggvast inneftir að kaupa ábót á linsurnar mínar. Þarf svo að halda á með að vinna..

Ég verð að viðurkenna það að það er kominn kosningafiðringur í mig. Bæði hlakka ég til að kjósa á laugardaginn - hef nefnilegast aldrei kosið á kjördag - og svo eru komnar áhyggjur yfir því hvort að pabbi verði inni eða ekki. Allir að kjósa Framsókn svo pabbi hafi vinnu næstu fjögur árin!! :p Annars var ég að pæla í hvernig stjórn ég myndi helst vilja hafa eftir kosningar. Mér líst best á stjórn Framsóknar og Samfylkingar. Það er reyndar ekki raunhæfur möguleiki miðað við kannanir en ég held samt að það kæmi best út. Það er löngu kominn tími á að Íhaldið hverfi úr stjórn. Davíð er gjörsamlega að spila út núna. Ég gapti yfir fréttunum á Stöð 2 á laugardaginn þegar maðurinn var að fjalla um fátæktarskýrslu Hörpu Njáls. Hann er bara ekkert að sætta sig við það að það sé komin fram skýrsla sem sýni að hér sé fátækt. Hann rakkaði hana í svaðið. Sagði að allt þetta væri Reykjavíkurborg að kenna því að þar hefði félagsleg aðstoð verið minnkuð 1995. Síðan klikkti hann út með því að segja að menn efuðust um að Harpa Njáls væri yfir höfuð til!! Manneskjan er menntaður félagsfræðingur og þessi skýrsla er niðurstaða fjögurra ára vinnu. Í skýrslunni stendur auk þess að fátækt sé vandamál hjá þeim þjóðfélagshópum sem þiggja bætur af Ríkinu. Það kemur varla Reykjavíkurborg við - ekki nema að það sé þeirra hlutverk að bæta fyrir það sem Ríkið gerir ekki nógu vel... Það hefur aldrei verið leyndarmál að velferðarkerfið er ekki eitt af aðaláhugamálum íhaldsins. Þeir sinna hagsstjórninni vel and that´s it! Guð hjálpi öryrkjum, ellilífeyrisþegum, atvinnulausum, námsmönnum og öðrum ef íhaldið verður áfram í stjórn.

Úff, var að fara yfir húsnæðismál með mömmu. Ég er ekki að sjá það að ég eigi hreinlega eftir að hafa efni á því að fara í skólann í haust. Þó svo ég selji bílinn þá væri staðan samt tæp. Ég á eftir að fá lítið sem ekkert í námslán næsta vetur því ég er búin að vera að vinna - en samt hef ég verið í svo illa borgaðri vinnu að ég hef lítið sem ekkert náð að leggja fyrir. Ég ætla mér að vera MJÖG sparsöm í sumar og vera dugleg að leggja fyrir - en það dugir samt skammt. Svo ef ég fer að vinna með skólanum sé ég fram á að fá bara ennþá minna í námslán næsta vetur - og þá þarf ég að vinna meira! Þvílíkt og annað eins kerfi!! Ætla að setjast niður með honum föður mínum á eftir og athuga hvort hann geri sér grein fyrir því að staðan sé svona - ekki bara hjá mér heldur hjá fjölda mörgum í þjóðfélaginu.

Pleh, er orðin pirruð á að pæla í þessu. Ætla að reyna að einbeita mér að einhverju í vinnunni...

HÚN RAKEL LITLA SYSTIR ER 18 ÁRA Í DAG. MÁ KJÓSA OG ALLT Á LAUGARDAGINN!!!! INNILEGA TIL HAMINGJU MEÐ DAGINN ELSKU RAKELIN MÍN! HAFÐU ÞAÐ ALVEG ROSALEGA GOTT :)

Ég var víst búin að lofa því að setja það inn á netið að hún Þóranna frænka mín er ófrísk - öllum til mikillar gleði!!! Það er bara vonandi að allt eigi eftir að ganga vel hjá henni og gæjanum!! Og svona fyrst við erum á þessum nótum þá er Þórdís vinkona líka ófrísk. Ég er nú búin að óska henni og Tomma til hamingju en nota bara tækifærið og geri það aftur!

Jæja, þá er maður að koma sér af stað eftir helgina. Það er alveg rosalegur mánudagur í mér og ég er nánast ekki búin að gera neitt af viti eftir hádegi. Mig og Unu langaði í nammi - eins og stundum áður í viðveru - og Dóra Lína tók okkur með í göngutúr út á bæjarskrifstofu, í bankann og svo í búðina að kaupa nammi. Síðan hlömmuðum við okkur niður inn á kennarastofu og að sjálfsögðu komu allir og settust hjá okkur því það langar alltaf öllum í nammi hjá okkur. Við nammið sköpuðust miklar stjórnmálaumræður um hvað væri skynsamlegast að kjósa fyrir Vestfirðinga. Mér fannst soldið athyglisvert að enginn var á því að Frjálslyndir væru að gera eitthvað af viti. Þeir eiga víst svo mikið fylgi hér. Addi Kitta Gau er greinilega alveg úti á þekju. Ég verð eiginlega að viðurkenna að ég vona að þeim fatist flugið og nái ekki verulegu fylgi - ég hef það litla trú á þeim greyjunum. Ég held að það yrði hræðilegt ef hérna yrði stjórn Samfylkingar, Vinstri Grænna og Frjálslyndra eftir kosningar. Við vorum öll sammála því að það virðist sem hugmyndir flokkanna t.d. í sjávarútvegsmálum séu frekar illa úthugsaðar. Það getur enginn nákvæmlega svarað fyrir það hvernig þetta verður ef leiðir þeirra verða farnar. Halda þeir t.d. að það þýði það sama fyrir Samherja og álíka stórútgerðir og fyrir smá útgerðir sem eru ráðandi í þeim sjávarbyggðum sem hafa farið verst út úr kvótakerfinu og eyðibyggðastefnu ríkisstjórnarinnar?? Þessar fyrningarleiðir þýða bara helmingi verri stöðu fyrir þessar smá útgerðir og þar af leiðandi væntanlega ekki betri stöðu fyrir sjávarbyggðirnar. Það er ekki það sama að innkalla 5% af kvóta Samherja og 5% af kvóta trillukarls t.d. hér í Bolungarvík. Það hlýtur að gefa auga leið. Trillukarlinn á miklu meira undir þessum 5% heldur en Samherji. Fyrir þá er það bara dropi í hafið. Það er bara vonandi að þessir stjórnmálamenn fari að taka sér meiri tíma í þróunarvinnu á svona hugmyndum og sýna vandaðri vinnubrögð.. Þá kannski fer maður að treysta þeim almennilega!

Ég var alveg rosalega ánægð með hann Pálma Gests í þættinum hjá Gísla Marteini á laugardagskvöldið. Gísli fór eitthvað að tala um að Pálmi væri héðan og kom með þá hræðilegu villu Á Bolungarvík.. Pálmi var fljótur að leiðrétta hann - auðvitað segir maður Í Bolungarvík. Pálmi segir reyndar eins og mamma BolungAvík. Sigurgeir afi hefur örugglega alið þetta upp í þeim. Mamma hefur ekki náð að ala þetta upp hjá okkur systkinunum þannig að við segjum öll Bolungarvík. Magga Frímanns kom líka í þáttinn. Dagný systir fannst eitthvað asnalegt að hún kæmi sköllótt - þ.e. ekki með hatt, skuplu eða eitthvað álíka. Mér fannst hún sýna hugrekki með því að koma svona fram. Það er ekki beint vaninn að konur hafi kjark í að koma svona fram. Ég veit að ekki myndi ég þora því.

Nú erum ég og Una báðar búnar að hella okkur yfir þennan gaur sem er með bloggari.is. Að það sé lágmark að biðja um leyfi áður en hann taki mynd af manni. Þetta er allt of lítið samfélag hérna til þess að það sé hægt að hafa svona síðu. Ég hef lent í því að það var mynd af mér þarna inni sem fór eins og eldur í sinu hjá krökkunum sem ég er að kenna og þau voru að sýna foreldrum sínum hana. Vissulega ber ég ábyrgð á sjálfri mér á djamminu (já eða fjörinu) en maður á ekki að vera að lenda í því að sjá einhverjar misjafnar myndir af sér á netinu daginn eftir. Ég veit það að þeir sem eru með svona síður verða að taka myndirnar út sé beðið um það - en eins og ég lenti í þá virkaði ekki það netfang sem var uppgefið á síðunni. Það þarf að einhverja breytingu á lögunum þarna finnst mér. Það verður að gera aðstandendum svona síðna það skylt að biðja um leyfi áður en efni er sett inn á netið. Sérstaklega þar sem um er að ræða myndir af fólki í misjöfnu ástandi. Það vill enginn hafa mynd af sér hálf dauðum á netinu. Þó svo ábyrgðin á því að það gerist ekki sé manns sjálfs þá vita það allir að þetta getur komið fyrir á bestu bæjum.

Jæja, þá ætla ég að fara að koma mér heim eftir alveg rosalega afkastamikinn mánudag... Held ég komi mér vel fyrir í kvöld og fari yfir próf og jafnvel nokkrar ritgerðir.

Jæja, þá er mín að komast almennilega á lappir aftur. Fór í vinnuna í gær og vann svo fyrir Dísu á Skýlinu í gærkvöldi svo að hún kæmist í leikhús. Leikfélag Hólmavíkur var að sýna Sex í sveit í félagsheimilinu. Ég var búin að sjá þetta svo að sjálfsögðu vann ég fyrir Dísu. Það var bara fínt að koma svona aðeins inn á Skýlið aftur. Það er alltaf gaman að spjalla við þær gömlu þar. Ég er svo búin að vera algjörlega tóm í haus í dag. Gerði samt kennaraeintakið af prófinu sem ég verð með á morgun og skipulagði seinustu kennsluvikurnar í huganum. Það verður ágætt þegar skólinn verður búinn. Maður á samt eftir að sakna þess að vera þarna. Mér finnst ég eiga smá í öllum krökkunum sem ég hef verið að kenna. Það verður gaman að fylgjast með þeim í framtíðinni! Þegar ég var búin með prófið setti ég Eyjadiskinn í botn og fór að þrífa. Mér fannst ég vera öfga dugleg! Nennti samt ekki að þurrka af - geri það bara á morgun eða eitthvað. Það hlýtur að vera í lagi að rykið hlífi húsgögnunum aðeins lengur :p

Ég var að hugsa hvað það verður skrýtið að fara suður aftur í haust. Samt er ég farin að hlakka til þess. Það er bara verst að maður geti ekki blandað saman Bolungarvík og Reykjavík í hið fullkomna bæjarfélag! Ef ég gæti haft fjöllin mín og umhverfið en ekki kjaftaganginn í fólkinu og náttúrulega haft vini mína og fjölskylduna hjá mér. Only in a perfect world... Ég þarf að fara að búa hann til, er ekkert sátt við þetta núna. Amma dekraði samt við mig í gær. Mig langaði svoooo mikið í rusl mat svo amma eldaði fyrir mig geðveikt góðann hamborgara. Á morgun fæ ég svo svið og rófustöppu.. namm.. Hlakkar ekkert smá til - langt síðan ég hef fengið svið að borða.

Eitt sem ég var að spá... sem sýnir kannski hvað ég á lítið líf núna :p Af hverju er alltaf sagt að það sé einhver að tala illa um mann þegar maður hikstar?? Á sá sem er að tala illa um mann að senda manni einhverja vonda strauma sem verða til þess að allt systemið í manni fer að hiksta?? Kannski fáránleg pæling... en kannski ekki.. Varla fáránlegra en þessi hugmynd að tengja baktal við hiksta... Ég var síðan að horfa á hanboltaleik með öðru auganu á þriðjudagskvöldið. Þá fór ég að spá af hverju ætli maður hoppi alltaf þegar maður er ofsalega glaður eða er að fagna einhverju?? Er eitthvað rosalegt boðefnaflæði í gangi í líkamanum sem er bara hægt að fá útrás fyrir með því að hoppa? Þetta hefði verið gott efni í BA ritgerð í sálfræðinni ef ég hefði haldið áfram í henni :p Látið mig samt vita ef þið vitið um einhvern sem hefur rannsakað þetta!

Jæja, það er kominn matartími hjá henni ömmu minni og ég er ekki mætt á svæðið. Ætla að drífa mig niðureftir og athuga hvað ég fæ gott að borða í kvöld.

Nú er mínz búin að vera heima lasin í dag. Ég var gjörsamlega búin á því þegar ég kom heim úr vinnunni í gær og ákvað að vera skynsöm og ná þessu almennilega úr mér í staðin fyrir að vera hundslöpp jafnvel í marga daga í viðbót. Hausverkurinn er búinn að minnka í dag og hellan fyrir eyrunum líka. Verð vonandi eld hress og spræk á morgun. Er alveg að mygla á því að hanga svona heima hjá mér. Amma kom samt við í dag, var búin að kaupa kók og fleira góðgæti fyrir mig.

Ég var að skoða síðuna hans Kristins Breka áðan. (Það er linkur inn á hana hérna til hliðar). Dagný var að setja inn nýjar myndir. Ég er nú ekkert að pæla í því dags daglega að ég hef ekki nánasta fólkið mitt hérna - þe. fyrir utan ömmu þeas. Enda hefði ég aldrei enst hérna í vetur ef ég væri alltaf að pæla í því. En þegar ég skoðaði myndirnar af mömmu, Dagnýju og Hauki með púkann í göngutúr þá greip mig einhver saknaðartilfinning. Hefði sko alveg viljað vera í þessum göngutúr með þeim. En sumarið er víst tími heimsókna þannig að vonandi á ég eftir að sjá eitthvað af fjölskyldu og vinum í sumar. Ég var að fatta það að núna verð ég upptekin nánast allar helgar fram að Þjóðhátíð. Á næstu helgi eru kosningar - og það verður sko stór stund hjá mér að fá loksins að kjósa á kjördag!! Helgin eftir það er seinasta helgi fyrir prófaviku þannig að líklegast verð ég að vinna. Helgin eftir það er í miðjum prófum.. þannig again vinna. Helgina eftir það eru skólaslit - and again vinna.. Kannski næ ég smá djammi ef af fermingarafmælinu mínu verður. Annars verð ég að vinna á skýlinu líka. Eftir þá helgi byrja ég alveg á skýlinu og þá verður lítið líf. En í lok ágúst kem ég suður og verð þá vonandi búin að fá íbúð og vinnu með skólanum. Það lítur reyndar ágætlega út með vinnu en ekki eins vel með íbúð. Ef þið vitið um eitthvað endilega látið mig vita!!!!!!

Ég er alveg að mygla.. Er alveg stútfull af kvefi, með hausverk og hellu fyrir eyrunum. Gat ekki einu sinni opnað annað augað þegar ég vaknaði í nótt. Ég fór nú samt í vinnuna. Bað krakkana um að vera nú góð því ég væri hálf lasin. Þau voru fljót að skjóta mig á kaf með það.. Dóra Lína (umsjónarkennarinn þeirra) segir að maður eigi að vera heima þegar maður er veikur. Af hverju ert þú ekki heima Erla? Ég var að reyna að segja þeim að það væri farið að styttast í próf og þau mættu ekki við því að fara að missa úr núna. Þau voru ekkert að sjá lógíkina í því.

Það er eitt sem ég hef verið að reka mig á í fjölmiðlum undanfarið en það er hvað er menning? Ég lærði hjá henni Grétu í Kvennó að menning væri allt mannlegt, allt sem maðurinn tæki sér fyrir hendur. Í fjölmiðlum og í samfélaginu yfir höfuð fáum við þá hugmynd að menning sé t.d. klassísk tónlist, bókmenntir og aðrir ,,hámenningarlegir" viðburðir eða hlutir. Þessi skilgreining truflar mig soldið mikið. Mér finnst það ekki sanngjarnt að gera greinarmun á rokktónleikum og sinfóníutónleikum hvað varðar menningu. Báðir atburðirnir eru jafn miklir menningaratburðir þó svo að þeir séu ólíkir. Að flokka annan sem hámenningu og hinn sem lágmenningu finnst mér bera merki um snobb.

Það er líka eitt sem ég hef verið að reka mig á í þeirri femínistaumræðu sem hefur verið undanfarið. Mér finnst það svolítið furðulegt. Þær vilja jafnrétti sem er gott og blessað. En þær taka alveg óskaplega nærri sér allt sem tengist kynferðismálum og er ég þá aðallega að vísa til þeirrar umræðu sem hefur verið út af auglýsingum Flugleiða. Þær tóku þá afstöðu að kæra Flugleiðir.. Ég var ekki alveg að skilja af hverju.. Ég meina af hverju er málið svona viðkvæmt. Allt í einu rann upp fyrir mér ljós. Þær taka því þannig að verið sé að vísa í lauslæti íslenskra kvenna. Ekki man ég til þess að það hafi sérstaklega verið tekið fram í auglýsingunni. Ég held að frekar hafi verið að vísa til þeirrar stereótýpu sem er af Íslendingum að þeir lauslátir. En þá fór ég að spá í því - hvað er lauslæti?? Er til eitthvað sem heitir lauslæti?? Halldór Laxness sagði eitt sinn að það væri ekki til neitt slíkt sem héti lauslæti. Hins vegar væri til kona sem svæfi þrjátíu sinnum hjá einum manni og kona sem svæfi einu sinni hjá þrjátíu mönnum. Með því að taka undir þessar lauslætishugmyndir með því að kæra Flugleiðir finnst mér femínistarnir sína hvað þær eru komnar stutt á braut sinni til jafnréttis. Þær vilja jafnrétti en eru ekki búnar að átta sig á því að hluti af leiðinni þangað liggur í því að breyta svona gamaldags stöðluðum ímyndum. Þær vilja jafnrétti á heimilunum og í starfi en virðast ekki gera neina tilraun til að fá jafnrétti í raun og veru. Þær eru ekki ennþá búnar að losa sig úr viðjum hugsunarháttar sem maður í einfeldni sinni taldi að væri gjörsamlega úreltur. Það er þessi hugsunarháttur (að konur séu lauslátar, að karlmönnum sé ekki treystandi fyrir börnunum sínum, að börn séu lausaleikskrógar o.s.fvr.) sem fjötrar konur niður meira heldur en nokkuð annað. Á meðan að þær losa sig ekki úr honum þá geta þær ekki búist við því að margt breytist.

Jæja, þarf að fara að kenna. Síðasti tíminn í dag. Síðan tekur við kennarafundur og viðvera til kl. 4. Fer svo beint heim í rúmið með Otrivin og Strepsils...

Ég er ennþá að hlægja að myndinni sem var á Stöð 2 í gær. Þessari Orgazmo mynd. Þvílík og önnur eins steypa. Ég horði meira á myndina eftir að ég kláraði að blogga í gær og verð að viðurkenna að ég grenjaði úr hlátri. Fyrir þá sem ekki sáu myndina þá var hún um gerð klámmyndar þar sem aðalsöguhetjan var Orgazmo, leikinn af einhverjum mormóna frá Utah. Hann var ekki alveg að meika að leika í þessari mynd, gerði það bara fyrir peningana. Hann gat ekki einu sinni leikið í ríðingaratriðunum, þurfti að hafa staðgengil. Mér fannst samt fyndnast að það var ekki hann sem fullnægði öllum gellunum eins og ég hélt þegar myndin var að byrja. Hann var með einhverja græju sem hann notaði til að skjóta á fólkið og þá byrjaði það að fá það á fullu. Ég sá nú ekki alveg pointið með þessu í myndinni. Það er hægt að kaupa sér svipaðar græjur á þó nokkrum stöðum á Íslandi - og maður þarf engann gaur til að hjálpa sér að láta það virka!! Það myndi hins vegar krydda notkun þeirra talsvert ef einhver flottur gaur væri með manni :p

Jæja, ég ætla að taka verkjatöflu og leggjast upp í sófa. Er alveg að mygla, með hausverk og uppfull af kvefi.

Jæja, þá er best að fara að segja eitthvað af viti hérna. Er ekkert búin að röfla um pólitík eða neitt lengi!!

Ég er loksins búin að ákveða hvað ég ætla að kjósa. Er búin að ákveða að gefa pabba gamla (og Framsókn) atkvæðið mitt. Eins og ég var búin að segja hérna var ég að spá í að kjósa Samfylkinguna og Ingibjörgu Sólrúnu en eftir forsætisráðherra auglýsinguna hætti ég öllum slíkum pælingum. Að prómótera einstakling út af kynferði finnst mér út í hött. Það á enginn að græða á kynferði sínu - hvort sem það er karl eða kona. Það skein í gegnum alla þessa auglýsingu - loksins eigið þið kost á konu sem forsætisráðherra.. Það var nóg til þess að missa af mínu atkvæði. Svona kynjakvótastefna finnst mér ekki vera jafnréttissinnuð. Hún ýtir undir það að karlmönnum sé mismunað. Sumir myndu þá segja að karlmenn ættu það inni - en hvers eiga karlmenn okkar kynslóðar að gjalda?!?! Það er ekki þeim að kenna hvernig fortíðin hefur verið og þeir eiga ekki að líða fyrir það. Ef tveir jafnhæfir einstaklingar sækja um starf á að boða báða í viðtal, láta þá velja skjaldarmerkið eða loðnuna og sá sem vinnur uppkastið fær vinnuna. Þannig getur enginn kvartað undan misrétti. Annars er ég alveg á því að Framsókn er að vinna kosningabaráttuna þegar kemur að sjónvarpsauglýsingum. Eins og Gunnar Smári sagði í Íslandi í dag í kvöld þá hafa aldrei áður verið fyndnar auglýsingar í kosningabaráttu á Íslandi. Auglýsingin þar sem gaurinn er að reyna að taka bensín er gargandi snilld!! Auglýsingarnar með húsnæðislánunum eru líka góðar. Sérstaklega í því samfélagi sem við búum í í dag þar sem að krakkar eru heima hjá foreldrum sínum langt fram undir þrítugt... Hinir stjórnmálaflokkarnir eru heldur ekki alveg að gera það fyrir mig. Frjálslyndir... Sorrý, en ég hef nákvæmlega enga trú á Adda Kitta Gau eins og ég hef sagt áður. Ég meina, þeir misreiknuðu sig um litla 10 milljarða í skattalækkunarloforðum sínum... Frambjóðendur þeirra hafa líka komið illa út úr umræðuþáttum. Alltof oft sér maður liðið reyna að krafla sig út úr einhverju sem það virðist varla vita neitt um. Þetta lið er sameinað í kringum kvótakerfið - sem er svo sem gott og blessað - en ég er bara ekki að sjá þau gera neitt í öðrum málaflokkum. Fyrir utan það að það eru alltof miklar líkur á því að þau fari í stjórn með íhaldinu ef sú staða kæmi upp. Meirihlutinn af þessu liði er klofningur þaðan og á því í raun meira sameiginlegt með þeim heldur en hinum flokkunum. Þetta Nýja afl... Maður veit einhvern vegin ekkert um þá, en þetta lítur út fyrir að vera bara einhverjir miðaldra karlmenn sem langar til að gera eitthvað annað en að reyna við yngri gellur í sínum midlife crisis... Vinstri grænir, well, ég er alltaf hrifin af Steingrími. Hann kemur mjög vel fyrir og maður veit hvar maður hefur hann sem stjórnmálamann. Ég er mjög hrifin af hugmynd þeirra um að fella niður leikskólagjöldin. Að mínu mati á leikskólinn að vera fyrsta skólastig barnsins - ekki bara í orði heldur á borði líka. Það á að gera þeim hærra undir höfði og reyna að útrýma þeirri hugsun að þeir séu bara geymslustaðir fyrir púkana. En þetta er ekki hægt að gera án þess að fella niður leikskólagjöldin. Með því að vera að rukka þau er verið að halda í þá hugsun að þetta sé bara geymslustaður. Þetta er hins vegar ein af fáum hugmyndum þeirra sem mér líst eitthvað á, er greinilega ekki nógu mikill kommi til að kjósa þá :P Íhaldið... Well, you all know what I think about them! Þeir stjórna efnahagnum vel en þegar kemur að einhverju sem heitir velferðarkerfi eru þeir alveg glataðir. Íhaldið er t.d. búið að vera eitt með meirihluta í LÍN undanfarin ár - og frammistaðan þar hefur ekki verið að heilla mig.. Dr. GIB hefur ekki verið að gera neitt sérstakt á þessum vígstöðvum og ég vil sjá íhaldið út úr stjórn LÍN með hraði. Mér finnst alveg furðulegt að stúdentar kjósi Vöku í meirihluta stúdentaráðs. Ætli liðið sé að átta sig á tengslum Vöku við stjórn sjóðsins undanfarin ár og því sem að íhaldið hefur gert (já eða ekki gert) fyrir námsmenn á meðan þeir hafa haft menntamálaráðuneytið..

Á Skírdagskvöld fór ég á kosningaskemmtun á Flateyri. Þar kom Óli popp með nokkuð góðan punkt um þessa auglýsingaumræðu og Flugleiðir og allan þann pakka. Hann ætlaði að fara í mál við Pampers fyrir að stíla eingöngu inn á mömmur í auglýsingum sínum. Mér fannst það ansi góður punktur því að þessir femínistar virðast aðeins vilja jafnrétti á sérvöldum stöðum... Þegar ég pæli í baráttu þeirra þá detta mér oft í hug orð sem einhver voðalega vitur sagði einhvern tíman: ,,Gallinn við jafnréttið er sá að við viljum aðeins vera jöfn þeim sem standa okkur ofar". Þetta segir allt sem segja þarf....

Það er í alvörunni að byrja mynd á Stöð 2 sem heitir ,,Orgazmo"... Eftir byrjunarmyndunum að dæma á þetta að vera eitthvað ofurmenni sem hlýtur að eiga að geta gefið fullnægingar á færibandi. Ég veit ekki hvernig lífið væri ef maður gæti bara fengið eitt stykki ofurgaur til að fullnægja sér á hverju kvöldi - orðið alltof langt síðan ég hef átt kærasta :P Jæja, ætla ekki að fara út í þessa umræðu - veit ekki hvort mamma og pabbi lesa þetta :p Oh my god.. Orgazmo gaurinn er að bjarga einhverri gellu frá Ron Jeremy.. Þvílíka steypan.. Ekki það að gellan hafi ekki verið heppin að losna undan Ron Jeremy :p Jæja, ég ætla að hætta þessu áður en ég fer út í einhverja vitleysu..

GLEÐILEGT SUMAR :)

Jæja, þá er sumarið loksins komið samkvæmt dagatalinu. Ég ætla að huga að því í næstu viku að skipta um dekk á bílnum. Þorði því ekki núna fyrst að það er spáð einhverju hreti yfir helgina. Ég er ennþá löt eftir páskafríið. Byrjaði samt að prjóna peysuna mína í gær. Það gengur bara fjandi vel þó svo ég segi sjálf frá. Er svo bara búin að vera að dúllast í dag. Amma kom í heimsókn til að kenna mér að strauja skyrtur almennilega. Það gekk bara vel held ég. Ég ætla svo bara að vera róleg yfir helgina og reyna að koma mér í að fara yfir þessar kjörbókarritgerðir. Fór á bókasafnið í gær og náði mér í nokkrar bækur svo ég gæti byrjað á þessu. Jæja, ég er alveg tóm í haus. Er að spá í að fara heim og prjóna. Er orðin alveg rosalega húsleg eitthvað :p

By the way - allir sem ekki eru búnir að skrifa í gestabókina - vinsamlegast kvitta fyrir komuna!!

Jæja, fyrsti vinnudagurinn búinn. Það var ekkert smá erfitt að vakna í morgun... En það hafðist og dagurinn gekk bara vel. Enginn órói í liðinu eftir fríið. Ég er búin að panta með Herjólfi fyrir Verslunarmannahelgina. Pantaði fyrir bílinn og káetu á leiðinni heim. Svo hringdi ég í Huldu Karls sem verður yfirmaðurinn minn í sumar - upp á hvernig það verður. Hún er að klára að setja niður vaktaplanið fyrir sumarið þannig að ég get farið að kíkja á hvernig ég verð að vinna. Þá á ég bara eftir að heyra í Kidda og Hildi í Eyjum og athuga hvort þau gætu hjálpað mér að redda gistingu fyrir ömmu á Þjóðhátíð ef að gistingin sem er plönuð fyrir hana klikkar. Hún amma gamla ætlar nefnilegast að koma með mér á Þjóðhátíð!! Reyndar ætlar vinafólk okkar - Dísa og Pétur - sem eiga íbúðina sem ég leigi - að fara líka og Addý og Dengsi líka þannig að amma ætti að hafa nægan félagsskap. En mig langar samt að kynna hana - og mömmu ef hún kemur líka - fyrir fósturfamilíunni í Eyjum. Það er svo bara vonandi að þau kíki vestur í sumar - blikk blikk ;)

Jæja, ætla að fara að drífa mig heim. Þarf að taka til og skipta á rúminu, ætla að sjá hvort ég nenni því núna.

Þá eru páskarnir búnir og þar með allt djammið. Við byrjuðum á því að fara á Tvö dónaleg haust á miðvikudaginn og það var fínt. Slefuðum vel yfir söngvaranum - ekki lítið flottur gaurinn!!!!!! Á fimmtudaginn fór ég í fermingarveislu til Rebekku og síðan með pabba, Elsu og Rakel yfir á Flateyri um kvöldið. Lýður læknir var með kosningaskemmtikvöld þar. Það var alveg ljómandi gaman. Á föstudaginn langa fórum við systur yfir á Flateyri í sund og síðan í mat til ömmu. Eftir það tók ég stelpurnar með mér í partý inn í Framsóknarhús á Ísafirði - þar sem var frítt vín... Síðan var farið á ball með Írafár í Hnífsdal. Það var mjög gaman - held ég bara.. Á laugardagskvöldið fór ég að djamma með Sigurborgu frænku. Við fórum á Tvö dónaleg haust. Maður varð nú að tékka aðeins betur á þessum söngvara :p Það var fámennt en góðmennt djamm. Enduðum nokkur heima hjá mér og grilluðum okkur samlokur áður en var farið í háttinn. Í gær var svo vaknað til að horfa á formúluna - sem var ansi leiðinleg miðað við seinustu keppnir. Minn maður náði þó öðru sæti sem verður bara að kallast gott. Ég fór svo í mat til ömmu og fór svo út með stelpunum í gær. Við fórum á Ber í Sjallanum. Þau voru alveg ágæt bara - en ég var bara á bíl og var því ekki að fíla mig sem skyldi innan um allt blindfulla liðið. Rakel fór svo suður í morgun þannig að núna er algjör afslöppun - enda kennsla á morgun. Það er samt gott að byrja svona eftir frí - kennt í 2 daga svo frí, kennt í 1 dag og svo frí. Maður kemur sér þá kannski almennilega í gang. Þarf að fara að kíkja á þessar ritgerðir sem ég var að láta 8. og 9.bekk skila. Svo er það prófundirbúningur.. En jæja, er alveg tóm í haus. Ætla að fara að horfa á vídeó - eða eitthvað álíka uppbyggjandi!

Jæja, þá er litla systir komin vestur. Við fórum með ömmu í Bónus áðan - þvílíka geðveikin!!!!!! Ég var bara eftir mig þegar ég kom þarna út. Það var hins vegar nánast enginn röð í Ríkinu. Það eru kannski bara allir farnir að brugga sjálfir :p Á eftir er ég að fara út að borða með Hrafnhildi, Ellu og Hrefnu. Veit ekki hvort Halldóra komi með. Síðan ætlum við heim til mín að fá okkur í glas og svo ætlum við að skella okkur á Kaffi Ísafjörð á Tvö dónleg haust. Ég er soldið spennt að sjá hvernig þeir eru. Á morgun er svo fermingin og rólegheit bara. Á föstudaginn verður djammað í Hnífsdal og svo erum við búnar að ákveða að fara á Flateyri að djamma á laugardaginn. Jæja, buxurnar eru orðnar þurrar. Var að stelast til að nota þurrkarann hjá pabba. Var ekki alveg tilbúin með djammgallan þegar stelpurnar hringdu. Hafið það gott yfir páskana elskurnar mínar - veit ekkert hvenær ég blögga næst.

Ég var að koma heim af Nóa Albinóa. Myndin er hrein snilld!!! Myndatakan er frábær, leikararnir sýna allir snilldar frammistöðu og þrátt fyrir að þetta sé drama mynd þá er lúmskur húmor í myndinni. Myndin er tekin upp hérna í Bolungarvík, á Ísafirði og Þingeyri. Það var soldið fyndið að sjá hvernig tökum á þessum stöðum er blandað saman. Nói er t.d. úti að borða í Félagsheimilinu hér með pabba sínum en er síðan hent út. Þá er honum hent út af Krúsinni á Ísafirði. Hann labbar fyrir næsta horn og er kominn á Þingeyri. Skiptir náttúrulega engu máli fyrir þá sem þekkja ekki til hérna en þetta truflaði mig svolítið á meðan ég horfði á myndina. Ég mæli allavegana tvímælalaust með þessari mynd. Bara drífa sig á hana og vera með opin hug fyrir henni.

Það var verið að dreifa Skíðavikublaðinu hingað. Ég gat ekki annað en hlegið þegar ég sá auglýsingu frá Bolungarvíkurkaupstað um opnunartíma skíðalyftunnar hérna yfir páskana. Hún á að vera opin alla dagana frá 10 til 19. Ég veit ekki hvort að það hafi alveg farið fram hjá þeim hjá bænum að það er nákvæmlega ENGINN snjór í fjallinu...

Jæja, er að bíða eftir að Rakel komi. Hún er að keyra með pabba og Elsu núna. Þau eru væntanlega einhvers staðar í Djúpinu eins og er. Það er víst alveg hryllilegt núna, ætli það verði ekki heflt á morgun fyrir páskatraffíkina. Ætla að fara að finna mér eitthvað að horfa á til að drepa tímann..

Úff, hvað mér leiðist núna! Það er nákvæmlega ekkert sem þarf að gera. Er samt að fara í bíó í kvöld með ömmu. Við erum að fara að sjá Nóa albinóa. Það verður gaman að sjá mynd sem er að mestu leyti tekin upp hér. Hrafnhildur kemur svo með seinni vélinni og Rakel keyrir með pabba og Elsu í kvöld þannig að maður ætti allavegana að hafa einhvern félagsskap á morgun. Ég og Ella erum að spá í að draga stelpurnar með okkur út að borða á Finnabæ á morgun. Maður verður að fara og smakka matinn hjá þeim. Síðan er fermingarveisla á Skírdag sem ég þarf að fara í. Á föstudaginn verður svo ballið í Hnífsdal og ætli maður kíki ekki yfir á Flateyri á laugardaginn. Ætla að heilsa upp á Láru vinkonu og djamma aðeins með henni. Á sunnudaginn er svo formúla. Það verður nice að maula páskaeggið á meðan maður horfir á hana. Síðan hefur maður mánudaginn til að hafa það gott áður en ég fer að kenna á þriðjudaginn. Þá þarf ég að byrja að fara yfir bunka af ritgerðum. Var að láta 8.-9. bekk skrifa kjörbókarritgerð í íslensku. Þá er líka farið að styttast í vorprófin og þar með lok skólaársins þannig að það ætti að vera nóg að gera hjá manni í maí! Ég fer líka að byrja að taka vaktir á Skýlinu - þar sem ég verð að vinna í sumar. Ég fæ víst mikla vinnu og á því eftir að eiga lítið líf í sumar. Fæ samt frí til að fara á Þjóðhátíð. Ég á líka eftir að eiga frí Sjómannadagshelgina. Þá eru skólaslit og bekkurinn minn gamli er að spá í að halda upp á 10 ára fermingarafmælið okkar þá. Það nennir enginn að vinna neitt í þessu svo ég dreif mig bara í því að senda út bréf á liðið og sagði þeim að tilkynna þátttöku fyrir 30. apríl. Ég ætla nú ekki að skipuleggja mikið. Við getum hist heima hjá mér og grillað. Skoðað gamla skólann okkar og horft á gamlar árshátíðir eða eitthvað álíka. Síðan var ég að spá í að biðja einhverja af gömlu kennurunum okkar að kíkja í heimsókn. Síðan færum við bara á ball niðrí Félagsheimili. Lítið mál að plana þetta. Hver kemur með sitt vín og sitt á grillið. Óþarfi að fara að búa til vandamál út af smámunum! Árgangur 1964 verður hérna að halda upp á 25 ára fermingarafmæli þessa sömu helgi og árg. 1977 er að spá í að halda upp á 10 ára útskriftarafmæli úr grunnskólanum líka þessa sömu helgi þannig að það ætti að verða fjör í bænum!

Jæja, ég ætla að fara að reyna að gera eitthvað af viti. Fer kannski í sund eða eitthvað til að hressa mig við.

Ég var að spjalla við mömmu í símanum. Við vorum að ræða pólitík - eins og er oft gert á mínu heimili. Við vorum að ræða Frjálslyndaflokkinn. Hann á mikið fylgi hérna á Vestfjörðunum því að aðalstefnumál hans er að afnema kvótakerfið. Ég verð samt að viðurkenna að þrátt fyrir göfug markmið þá hef ég ekki mikla trú á þeim. Ég sé t.d. Adda Kitta Gau ekki fyrir mér sem röggsaman foringja. Hann er bara gamall sjóari sem kann að rífa kjaft. Ég held líka að það vanti upp á stefnu í öðrum málaflokkum. Þeir stjórna ekki landinu bara í gegnum sjávarútvegsmálin. Það þarf líka að breyta fleiru en kvótakerfinu til að sína alvöru byggðastefnu. Það er ekki bara kvótakerfið sem er að leggja landsbyggðina í rúst - það er líka stefna stjórnvalda í öðrum málaflokkum. Fyrir utan það þá færu Frjálslyndir að öllum líkindum í stjórn með íhaldinu og það er eitthvað sem ég vil alls ekki sjá. Davíð Oddson er löngu búinn með sinn tíma. Hann er ekki í neinum tengslum við fólkið í landinu. Það sést best á fátæktarumræðunni sem er í gangi núna. Það er bara vita mál að bilið á milli þeirra sem eiga einhvern pening og þeirra sem eiga hann ekki er að breikka. Það er t.d. farið að verða munaður fyrir fólk að fara í háskólanám. Framfærslulán námsmanna eru langt undir raunhæfri framfærslu og þeir sem ekki eiga foreldra sem geta staðið við bakið á þeim á meðan þeir eru í skóla eiga bara einfaldlega ekki kost á háskólanámi í dag. Það er allavegana nokkuð ljóst að ég kýs hvorugan þessara flokka. Þá er bara að skoða hina þrjá sem bjóða fram í þessu kjördæmi betur. Já eða hina tvo. Því að ég kýs alveg pottþétt ekki Vinstri græna. Steingrímur J. er góður stjórnmálamaður en ég er ekki alveg jafn vinstri sinnuð og hann. Hann hefur fallegar hugsjónir að mörgu leyti, en ég er ekki alveg að sjá þær ganga upp í framkvæmd. Þá er það bara Framsókn og pabbi eða Samfylkingin og Ingibjörg Sólrún. Hún gæti náð jöfnunarsæti og þá munar um hvert atkvæði sama hvar það er á landinu. En það gæti líka verið málið með pabba. Þarf að hugsa þetta aðeins. Nógur tími ennþá!

Þetta er ekkert smá leiðinlegt mánudagskvöld. Ekkert í sjónvarpinu og maður er búinn að vera að slæpast í allan dag. Hrafnhildur og Rakel koma samt á morgun og þá verður vonandi meira um að vera hjá manni. Þá fer fríið að byrja fyrir alvöru! Er núna búin að sækja Dooleys flöskuna inn í ísskáp og ætla að njóta þess að vera í fríi. Ég ætla að byrja á að horfa á danska þáttinn sem var á RÚV í gær og síðan á Pretty woman eða eitthvað álíka skemmtilegt og njóta þess svo að sofa út á morgun!!

Það er eitt sem ég var að spá. Núna eru femínistar að gera allt vitlaust út af þessari Flugleiða auglýsingu. Eins og ég var búin að tjá mig um þá finnst mér þetta frekar mikil della hjá þeim. Flugleiðir eru að nota stereótýpu - sem nota bene enginn getur þrætt fyrir að sé ekki sönn - til að auglýsa ferðir sínar. Thule notar líka þessa aðferð í sínum auglýsingum. Gerir grín að Íslendingum yfir höfuð - og enginn gerir athugasemdir við það. Þær auglýsingar þykja bara flottar. Samt er verið að taka fyrir þá stereótýpu sem er af Íslendingum erlendis. Alveg eins og Flugleiðir eru að gera. Eins er Húsasmiðjan núna að keyra auglýsingar þar sem sýnt er ungt par sem er að koma sér fyrir á nýju heimili. Þar á konan að vera að skilja eftir miða til að minna manninn sinn á að klára hitt og þetta innan heimilisins. Ein auglýsingin sýnir t.d. manninn sækja sér epli í pínkulítinn ísskáp. Þá blasir við honum miði frá konunni - sem situr og fylgist með honum - ,,muna ísskáp". Af hverju í ósköpunum reddar hún ekki ísskápnum sjálf? Þarf kallinn endilega að gera það?? Geta konur ekki verslað í Húsasmiðjunni líka??!! Ég hefði haldið að þetta myndi nú gera femínistana brjálaða... En svo virðist ekki vera. Það virðist skipta máli hvaða stereótýpa er notuð í auglýsingum. Ef undirtónninn er kynferðislegur þá verða konurnar brjálaðar. Það spáir enginn í því að það er örugglega ekki eingöngu verið að markaðsetja þessar ferðir til Íslands fyrir karlmenn. Konur geta alveg komið til Íslands og átt hér dirty weekend. Íslenskir karlmenn eru bara ekkert að taka þetta til sín!!

Jæja, er að spá í að fara að gera eitthvað af viti.

Jæja, þá er kominn fyrsti í páskafríi. Ég fór bara snemma að sofa í gær og var vöknuð kl hálf 9 í morgun. Datt samt ekki í hug að fara svona snemma fram úr svo ég píndi mig til að sofna aftur. Ég er búin að þrífa allt og fara inneftir í Bónus. Voða dugleg! Ætla svo að drífa mig í sund á eftir og svo í mat til ömmu. Í kvöld var ég svo búin að bjóða liðinu á kennarastofunni heim í tilefni af því að það er búið að opna Finnabæ aftur. Fyrir þá sem ekki vita er Finnabær veitingastaður og pöbb og er hann búinn að vera lokaður í nokkra mánuði. Ég veit ekki hvort það komi einhver - en það kemur þá bara í ljós!

Ég var að blaða í gegnum nýjasta Nýtt líf í gær. Þetta blað kallast víst kvennablað og ég verð að viðurkenna að það hefur alltaf farið nett í taugarnar á mér. Ég veit ekki til hvaða aldurshóps blaðið á að höfða en ég hef alltaf á tilfinningunni að það sé verið að tala til manns eins og maður sé einhver hálfviti. Það er líka viss tvískinnungur í blaðinu - eins og var bent á í lesendabréfi sem var birt í þessu blaði sem ég var að skoða. Það er fjallað um átraskanir og afleiðingar þeirra og það að maður á bara að vera maður sjálfur. Svo eru birtar liggur við við hliðina á þessum greinum myndir af þvengmjóum fyrirsætum sem er búið að photoshopa hægri vinstri. Allar auglýsingarnar í blaðinu miðast við það að selja konum e-r fegrunar- og yngingarlyf. Svona blöð verða að vera meðvituð um sína ábyrgð í samfélaginu. Það er langt frá því að allar unglingsstelpur geri sér grein fyrir því að búið er að laga til allar myndir sem birtast í svona blöðum. Ég ræddi þetta við bekkinn minn um daginn í tengslum við texta sem við vorum að lesa og það var enginn í bekknum sem hafði gert sér grein fyrir því að fyrirsæturnar litu ekki svona út í raunveruleikanum. Ef að blöðin ætla sér að birta falskan raunveruleika þá verða þau að upplýsa samfélagið um það. Þau hafa einfaldlega alltof mikil áhrif til að geta leyft sér að sleppa því. Annars er það orðið spurning hvað ríkisvaldið gæti gert í málinu. Það væri hægt að setja fræðslu um svona mál inn í Lífsleiknina sem er kennd í grunn- og framhaldsskólum. Eða búa til stuttar fræðslumyndir sem hægt væri að sýna í sjónvarpi. Hvernig það er gert skiptir kannski ekki höfuð máli en það er skylda samfélagsins að upplýsa þá sem eru að fara að fóta sig í því út á hvað það gengur.

Það var grein í þessu blaði um nýjasta æðið í lýtaaðgerðum úti í Bandaríkjunum en það er að konur eru að láta laga á sér skapabarmana. Aðallega víst að láta minnka þá. Ekki spurja mig um tilganginn. Þetta er eitt það fáránlegasta sem ég hef heyrt. Jafnvel fáránlegra heldur en Botox dæmið sem var síðasta tískubylgja. Þá voru andlitsvöðvarnir lamaðir í þeim tilgangi að slétta húðina. Konurnar voru ófærar um að sína nokkur svipbrigði - og hafa eflaust litið út eins og það væri eitthvað mikið að.... Það er bara vonandi að þessi tískubylgja nái ekki hingað til lands.

Jæja, ég er að spá í að drífa mig í sund og flatmaga í pottunum í góða veðrinu.

ÉG ER KOMIN Í PÁSKAFRÍ!!!!

Svakalega ætla ég að hafa það gott! Það er alveg nóg pláss ef einhvern langar að kíkja í heimsókn.... ;) Annars er Hrafnhildur að koma heim á þriðjudaginn. Við höfum ekkert náð að djamma saman á þessu ári þannig að það er aldeilis kominn tími til! Það er bara verst að það var hætt við SSSól ballið, en við finnum okkur eflaust eitthvað skemmtilegt að gera í staðinn. Lára er líka að koma vestur þannig að það verður möst að fara allavegana á eitt djamm á Flateyri. Við erum heldur ekkert búnar að djamma saman lengi þannig að það er kominn tími á gott djamm þar líka!

Það var ansi skemmtileg umræða á kennarastofunni í dag. Um það að fólk hefur aldrei tíma til að heimsækja vini og ættingja fyrr en liðið deyr. Þá komast allir í jarðarförina. Væri ekki vitlegra að gefa sér tímann í að umgangast þá sem manni þykir vænst um og njóta þeirra á meðan maður hefur þá í staðinn fyrir að gráta stundir sem maður gaf sér ekki tíma í þegar liðið er komið yfir móðuna miklu?! Þetta virðist kannski fjarlægt þegar maður er ungur og leikur sér en enginn veit sína ævi fyrr en öll er.

Jæja, ég ætla að fara að drífa mig út í góða veðrið.

Félagsmiðstöðin er farin að gefa út blað sem kallast Gríslingur. Í nýjasta blaðinu eru birt nokkur gullkorn frá efstubekkingum skólans. Ég ákvað að setja þau hérna inn - svona til að sýna ykkur hvernig ,,unga fólkið er nú til dags". Þið getið rétt ímyndað ykkur hvernig það er að reyna að troða viti í þessa krakka stundum...

- Var Bubbi Morthens í dópi?
- Er hægt að panta upp úr þessum bæklingi? (viðkomandi var að skoða forvarnarbækling með myndum af eiturlyfjum...)
- Er Evrópa stærri en heimurinn?
- Er Portúgal stjarnan þarna?
- Er páfinn íslenskur?
- Þegiðu þarna glyrnan þín.. (glyðran þín...)
- Eru bómullarbolir búnir til úr skapahárum? (Fyrirgefðu... en eru skapahár eitthvað lík bómul????)
- Eini munurinn á strákum og stelpum er að stelpur hafa brjóst en strákar typpi. Þessi var spurð hvort að hún væri ekki með píku....
- Reynum að muna eitthvað annað sem við munum
- Spægipylsur frá SOS
- Spurt um borg með 40.000 íbúa - Svalbarði
- Spurt um lönd með landamæri að Panama - New York, Chicago og Ástralía
- Er Kína í Asíu?
- Hvað er slydda?
- Ég spurði eina hvort hún vissi hvar Norðurpóllinn væri.... Já, hann er rétt hjá Grænlandi, við hliðina á Suðurpólnum! (Dýrleif er greinilega ekki sú eina sem veit ekki hvar Norðurpóllinn er....)
- Viljiði setja kalda hitann á (í rútu..)

Þarf ég að segja eitthvað meira....

Svona fyrst ég er komin yfir á þessar nótur þá verð ég að láta fylgja með sögur af honum Gubba frænda. Hann er alveg hreint einstaklega orðheppinn greyið..

Nú á dögunum var Guðbjartur að tala við vin sinn í síma. Bjartur var staddur í útlöndum og vinurinn hafði hringt í farsíma hans, eftir nokkuð langt spjall sagði Bjartur allt í einu hvern fjandann hef ég gert við símann “Venjulega er ég með hann í vasanum en nú finn ég hann hvergi, ætli ég hafi ekki týnt honum í gærkvöld,” Viðmælandinn var ekki alveg klár á því sem var að gerast og spurði því hvort að hann væri ekki að tala í umræddan síma. “Það var eins gott að þú hringdir, annars hefði ég ekkert fattað hvar síminn var,” svaraði þessi alþjóðlegi athafnamaður alshugar feginn.

Einhvern vetrarmorguninn mætti Guðbjartur mjög snemma í beitningaskúrinn og var enn myrk vetrarnótt. Þegar í skúrinn var komið sá ekki handarinnar skil og varð honum þá að orði: “Rosalega er dimmt, það hlýtur að vera búið að vera slökkt lengi,”

Guðbjartur er frægur beitningamaður og fljótari en gerist og gengur. Þegar best lét fastréð hann sig uppá sextán bala á dag auk þess sem hann var í slægingu með. Þegar hann var spurður um hvernin þetta væri hægt á meðan meðalmaður væri fullkeyptur af því að beita átta bala dag. Ekki stóð á snaggaralegu svarinu: “Það er ekki lengi gert að beita í hálftíma,”

Jæja, þetta er komið gott. Ætla að fara að drífa mig í slátur til ömmu.

Jæja, þá ætla ég að reyna þetta aftur.. Það fór ekki inn það sem ég skrifaði í gær.. Þá átti ég slæman dag vegna þess að einhverjum sem finnst fyndið að hringja í fólk á nóttunni hefur verið að bögga mig og systur mína. Dagný lét mig vita á mánudaginn að það hefði verið hringt í hana alla helgina. Á sunnudagsnóttina þóttist viðkomandi vera mamma og lét eins og það væri eitthvað mikið að. Dagný varð náttúrulega alveg skíthrædd og hringdi í Mosfellsbæinn, en þá var allt í stakasta lagi þar. Í fyrrinótt var svo hringt í mig - á sama tíma og hafði verið hringt í Dagnýju næturnar á undan. Frekar spooky. Ég er allavegana ekkert að kaupa það að þetta tengist ekki neitt. Ég svaf ekkert eftir að það var hringt og var alveg ónýt í gær. Fór líka til löggunnar og kærði þetta. Ég veit ekki hvað löggan hérna gerði mikið í málinu í gær en það var ekkert hringt í okkur systur í nótt. Það er bara vonandi að þetta hætti núna þegar við erum báðar búnar að kæra þetta.

Ég fór á framboðsfund hjá pabba og Magnúsi Stefánssyni í gærkvöldi. Mér leist svona ágætlega á stefnumálin hjá þeim en saknaði þó skýrrar stefnu í málefnum námsmanna. Pabbi fór vel yfir hvað ætti að gera í málefnum öryrkja og atvinnulausra. Hæstu mögulegu bætur öryrkja eru ca 95þús og atvinnuleysisbæturnar eru 77þús. Ég veit ekki hvort því var breytt í fyrra en þegar ég byrjaði í Háskólanum 2001 voru hámarksnámslán tæplega 70þús krónur og þau byrjuðu að skerðast þegar maður var búinn að þéna meira en 280þús yfir árið. Það er kvartað yfir því að atvinnuleysisbætur og örorkubætur séu lágar - en hvað þá með námslánin?!?!?!? Það er deginum ljósara að grunnframfærslan er langt frá því að vera raunhæf. Það sem ég er mest hissa á er að það er enginn stjórnmálaflokkur með skýra stefnu í málefnum námsmanna - allavegana er ekki verið að halda þeim á lofti. Námsmenn virðast heldur ekki vera með háværar raddir um að það þurfi að gera eitthvað til að breyta þessu kerfi - sem er engan vegin í takt við það samfélag sem við búum í í dag. Það er sorglegt hvað ungt fólk á Íslandi í dag hefur lítinn áhuga á stjórnmálum því það skilar sér í því að lítið er barist fyrir þeim málum sem standa okkur næst. Það vantar tilfinnanlega ungt fólk á Alþingi. Það er bara vonandi að það fari eitthvað að rætast úr þessum málum.

Jæja, ég ætla að reyna að fara að vinna eitthvað. Gerði nákvæmlega ekkert í gær.

Ég horfði á Kastljósið á föstudaginn. Það vill stundum verða skemmtilegt þá. Í þættinum þetta skiptið var gellan sem er með Sellófón, hin ofur málhalta Elva Dögg og Þórhildur Þorleifs - súper gribba. Það var gaman að hlusta á sellófón gelluna. Elva Dögg.... hún kemur varla út úr sér óbjagaðri setningu. Það er alveg hryllilegt að hlusta á manneskjuna. Það er alveg á hreinu að ef hún hefði ekki verið kosin Ungfrú Ísland.is þá væri hún aldrei kynnir í Lottóinu.. Hún getur ekki einu sinni kynnt það sómasamlega! Þær stöllur voru m.a. að ræða Flugleiða auglýsinguna sem ég gerði að umræðuefni í seinustu viku og voru sammála um að fyrirtækið væri að niðurlægja sig með þessum auglýsingum. Þvílíka annað eins bullið. Ég verð að viðurkenna það að svona femínistakjaftæði fer í mínar fínustu. Vissulega vantar fullt upp á að jafnrétti ríki á Íslandi en það sem þessar konur gleyma er að þær hafa þvílík völd í raun og veru. Hver er það sem elur upp yngstu kynslóðina í dag? Í langflestum tilfellum konur. Þó svo að ekki sé hægt að móta börnin eins og leir þá læra þau það sem fyrir þeim er haft... Það getur nefnilegast enginn breytt heiminum án þess að huga að því sem er miðpunktur heims hvers og eins - sjálfum sér. Ef að þessar konur myndu nú beina kröftum sínum að sinni fjölskyldu í staðin fyrir að vera að eilífu tuði sem engu skilar þá held ég að miklu meiri árangur náist. Það gleymist alltof oft að við sköpum okkar eigin heim - og það er okkar að ákveða hvernig við ætlum að lifa í honum.
Þessar gellur fóru náttúrulega líka að ræða klámvæðinguna og fannst hún að sjálfsögðu alveg hryllileg. OK, klámvæðingin sem slík er ekki hryllileg heldur hvernig fólkið í landinu hefur tekið á henni. Opnari umræða um kynferðismál er bara af hinu góða. Það væri bara óskandi að sem flestir foreldrar nýttu hana til að ræða þessi mál við börnin sín. Mér finnst það sorgleg staðreynd í samfélagi sem grasserar í kynsjúkdómum þá þekki börn á unglingastigi grunnskólanna ekki algengasta kynsjúkdóminn - klamedíu. Það sýnir bæði lélega kynfræðslu skólanna og ekki síður heimilanna. Ég held að þetta sé mál sem verði að taka á. Af því sem að ég hef rætt við krakkana sem ég er að kenna þá er nokkuð ljóst að þau vita lítið sem ekki neitt. Það er bara vonandi að bæði heimili og skóli komi til með að taka á þessu máli.

Jæja, ég ætla að fara að sofa. Er alveg steindauð..

Þá er árshátíðin loksins búin. Ég held að það sé óhætt að segja að hún hafi heppnast vel. Smá óhöpp voru á báðum sýningunum en krakkarnir stóðu sig alveg rosalega vel. Kennaragrínið var flott - ég verð samt að viðurkenna að það var hálf skrýtið að sjá gert grín að sjálfum sér. Þau byrjuðu á power point sýningu, þar sem búið var að taka myndir af krökkunum í kennaragerfum. Síðan voru þau búin að búa til mottó fyrir hvern kennara. Mitt var ,,sjaldan eða aldrei er maður í of fáum fötum". Stelpan sem lék mig var í stuttu pilsi með g-strenginn langt upp úr og í bol sem náði rétt niður fyrir brjóst... Á eftir þessari sýningu vorum við svo leikin upp á sviði, áttum að vera í tíma hjá sálfræðingi. Þar komu líka góð skot hjá þeim á alla kennarana. Á seinni sýningunni vorum við svo kölluð upp á svið og fengum rós. Hálf skrýtið að vera kvödd svona af krökkum sem ég er ekki einu sinni að kenna! En það var samt gaman að þessu.

Formúlan var í Brasilíu í dag. Ekkert smá svakaleg keppni!!! Maður mátti varla blikka augunum án þess að missa af einhverju! Mér fannst þeir hjá RÚV samt full fljótir að hleypa fréttunum að eftir að keppnin hafði verið stöðvuð. Maður var varla búinn að ná hvað hafði verið að gerast. Nú verður maður að horfa á Helgarsportið á eftir. Núna er víst búið að dæma Raikkonen sigurinn því skv reglunum gildir staðan sem var á hringnum áður en að keppnin var stöðvuð. Ég get allavegana ekki kvartað yfir frammistöðu minna manna!

Jæja, ætla að fara að hætta þessu. Það er algjört spennufall núna eftir árshátíðina þannig að maður er þokkalega tómur í haus...

Jæja, bara að láta vita að ég sé á lífi - að þessi árshátíðarundirbúningur sé ekki búinn að drepa mig! Ég var á fullu í gær við að skreyta Félagsheimilið og fleira. Var ekki komin heim fyrr en um kvöldmatarleytið. Í dag var svo generalprufan. Hún gekk svona lala. Það má allavegana alveg ganga betur á morgun! Ég þarf að vera mætt út í hús kl 1 í seinasta lagi og verð svo þar meira og minna til miðnættis því ég á að vera í gæslu á ballinu. Á bara eftir að ákveða í hverju ég á að vera.. Þarf að reyna að finna eitthvað sem er nógu fínt og hæfir tilefninu.. Jæja, ég ætla að fara að elda mér eitthvað.

Ég var að fá tölvupóst áðan þar sem verið var að safna undirskriftum gegn auglýsingaherferð Flugleiða þar sem meðal slagorða er "Fancy a dirty weekend in Iceland?". Ég verð að viðurkenna að ég skil ekki hvernig fólk nennir að pirra sig á svona hlutum. Vissulega hefur íslenskt kvenfólk á sér það orðspor að það sé sérstaklega easy - en af hverju er það? Og breytist orðsporið eitthvað með einhverri undirskriftasöfnun gegn Flugleiðum?? Það er eitt víst í auglýsingum og það er að kynlíf selur. Flugleiðir eru þarna að nýta sér þá stereótýpu sem margir hafa af Íslendingum - og af hverju ættu þeir ekki að mega það? Ef íslenskt kvenfólk móðgast eitthvað ætti það að líta aðeins í eigin barm. Ég er t.d. ekki easy - langt frá því - og ef einhverjir útlendingar reyna við mig á djamminu í von um auðfenginn drátt þá fá þeir skýr skilaboð: Gleymdu því vinur... Ef íslenskt kvenfólk vill breyta þessu orðspori sem fer af þeim ætti það að hugsa aðeins áður en það höstlar.. Ef það er ekki tilbúið til þess þá er nú lítið hægt að gera í málinu. Ég efast t.d. um að Bandaríkjamenn myndu kæra auglýsingastofu sem sýndi þá sem tóma í haus - samt er sú stereótýpa sem við höfum af týpíska Kananum sú að þeir séu gjörsamlega tómir í haus. Mín skilaboð til þeirra sem hófu þessa undirskriftasöfnun eru að maður getur ekki breytt öðrum. Maður getur hins vegar breytt sjálfum sér.. Pick your battles better than that! Það eru miklu fleiri hlutir mikilvægari...

Ég skil ekkert í því hvernig mér datt í hug að bjóða mig fram til að hjálpa Soffíu í þessari skreytinganefnd... Við vorum að hengja upp myndir í félagsheimilinu áðan og ætlum að fara í það á morgun að búa til eitthvað skraut.. Síðan þarf að klára að skreyta salinn á morgun. Seinasti dagur æfinga er líka á morgun - það þarf kraftaverk til að þetta smelli allt saman fyrir generalprufuna á föstudaginn.. En það er þetta íslenska viðhorf sem er í gangi - þetta reddast allt einhvern vegin! Þegar við vorum út í húsi áðan fundum við hluta af handritinu fyrir kennaragrínið :p Það lá bara á borðinu í miðjum salnum - það var ekki eins og við værum að leita að því... Það á að gera grín að öllum kennurunum og ég er búin að komast að því að ég verð tekin eitthvað fyrir. Það var samt ekki sá hluti sem við fundum - það var kennarafundur þá og svo var verið að gera grín að Dadda smíðakennara. Miðað við þennan hluta verður fróðlegt að sjá hvernig þetta kemur út.. Það er bara vonandi að þau verði góð við okkur!

Jæja, ég er orðin alveg tóm í haus. Þetta árshátíðarstúss tekur frá manni alla orku. Er að spá í að hafa það öfga gott í kvöld og fara á Thai Koon og fá mér eitthvað gott að borða. Kaupa svo eitthvað nammi og hafa það huggulegt fyrir framan sjónvarpið.